WALAY problema alang ni kanhi Cagayan de Oro First District Representative Benjo Benaldo kung unsa nga posisyon ang iyang daganan sa umaabot nga piliay sa Mayo 2019.
Human kumpirmado ang pagbalhin niini sa rehistro sa lungsod sa Tagoloan, Misamis Oriental diin kahinumduman botante kini sa dakbayan sa Cagayan de Oro dihang nagpapili ug napili nga kongresista.
Apan matud ni Benaldo sa interbyu sa SunStar SuperBalita nga dili niya pangunahan si Misamis Oriental Governor Yevgeny Vincente “Bambi” Emano nga maoy modeklarar sa kumpletong line-up sa ilang partido sa PaDayon Pilipino sa probinsya.
“Si Bambi Emano will be the one to declare on the 17 of October. Pwede ko nga mag vice governor, pwede sab congressman, depende kon unsa iyang isulat,” kini ang kumpirmasyon ni Benaldo.
Tungod sab kay usa kini sa board of directors sa Phividec Industrial Authority, gibutyag niini nga mosunod siya sa balaod nga mag resign sa katungdanan kay magpapili sa eleksyon.
Aminado si Benaldo nga dugay na niyang gikalimtan ang kalibutan sa pulitika. Apan tungod sab kay panahon kini sa Mindanao hilabina nga ang Presidente sa nasod nga si Rodrigo Duterte usa ka ka Mindanawan ug ang dako nga solidaridad sa Mindanao, iyang gibuksan pagbalik iyang kaikag sa pulitika.
“Kung makita nimo akong mga post sa Facebook, lipay na kaayo ko sa akong kaugalingon, dili na gyod unta ko ganahan og pulitika. I can do anything... I loved and I’m so blessed of what’s happening now. But then again, theres a call for Mindanao and call by Bambi Emano. It’s very clear, this is the time of Mindanao. We can be a solid Mindanao... that’s why I’m reconsidering,” panapos niini.