(Una sa duha ka mga gula)
“Bisan tinuod ang impormasyon, dili baya dayon kita motuo ilabi na dili nato kaila ang mensahero.”
SA KOLEHIYO nako nasugamakan ang hugpong sa mga pulong nga gigama ni Herbert Marshall McLuhan, usa ka propesor sa Canada, pilosopo, ug intelektwal sa publiko.
Ang iyang trabaho mao ang usa sa mga sumbanan sa pagtuon sa teorya sa media. Usa siya ka tigpasiugda sa diskurso sa media sa ulahing bahin sa dekada saysenta. Maayong adlaw diay kaninyo, higala!
Hagpaton ta ang titulo aron mas klaro, migo. Ang “medium” mao ang “channel” kun agianan sa mensahe sama sa radyo, telebisyon, pamantalaan sama niining Super B, apil ang tapuk-tapok, facebook, tsismis ug uban pa.
Ang “message” mao siyempre ang mensahe o impormasyon nga atong iagi sa nagkadaiyang “medium” aron makaabot sa tagtangud, igsuon.
Importanteng ato kining sayron kay bisan nindot kaayo ang mensahe, posibleng dili kini tuohan tungod kay ang nagdala walay kredibilidad o dili masaligan. Klaro?
Ang pangutana, ngano man lagi gilansang si Kristo nga tinuod man ang mensahe sa kaluwasan nga gidala Niya diri kanato? Awww, sa tan-aw nako, daghan man god ang wala pa nakaila Kaniya ug daghan pod ang kontra sa mensahe nga Iyang gidala. Tinuod apan wala nakahibalo ug nasabtan sa katawhan apil na ang mga kalaban mao nahimong ingon ato ang dagan.
Bisan tinuod ang impormasyon, dili baya dayon kita motuo ilabi na dili nato kaila ang mensahero. Tan-awa nang scam o negusyo sa pagpangilad; dili ba daghan ang nabiktima kay mga kaila nato ang nagkumbinse sa atoa?
Nalibog pa mo? Another example: sa mga mag-jowa (uyab oi), nadiretso sa kaminyuon bisan dili pa saktong higayon kay si Inday wala kapugong tungod duol sa dughan si Dodong. Ending, ningkanta sila'g, “udong nga lami, nga makahigugma,” tinapa man god ang sud-an pirmi nila kay walay igong trabaho ug kuwarta kay bata pa nahigugma na”, ha ha!
Si Mocha Uson, daku'g tabang kay President Rodrigo Duterte niadto sa kampanya pero karon sige'g pabuyag bah! Daku'g suweldo sa atong gobyerno apan walay lalum nga pagsabot sa kaseryuso sa iyang trabaho.