NAKATILAW na og daog si LeBron James isip usa ka sakop sa Los Angeles Lakers.
Human sila nasugamak sa duha ka sunodsunod nga kapildihan, ang Lakers ningbangon sulod sa ilang balwarte nga mao ang Staples Center ug gipaluhod ang Sacrmento Kings, 128-123, kagahapon sa pre-season sa National Basketball Association (NBA).
Si James, kinsa four-time MVP, nitampo og 18 puntos alang alang sa kadaugan.
Miduwa si James sulod lang sa 15 ka mga minutos sa 1st half una kini mipahuway sa tibuok 2nd half.
Ang kadaugan sa Lakers gipangulohan ni Brandon Ingram pinaagi sa iyang 31 puntos samtang nidugang og 17 puntos matag usa sila si Kyle Kuzma ug Josh Hart.
Ang Kings gipangulohan sa ilang 2nd overell pick nga si Marvin Bagley III pinaagi sa iyang 19 puntos, nihatag og 18 puntos si De’Aaron Fox samtang niamot og 16 puntos si Buddy Hield.
Sa laing duwa, nagpakatap og 24 puntos lakip na niini ang upat ka three-point shots si Victor Olapido aron agakon ang Indiana Pacers sa kadaugan batok sa Houston Rockets, 110-100.
Niamot og 15 puntos ug 12 rebounds si Domantas Sabonis alang sa Pacers samtang nitunol og 13 puntos ug 12 sab ka rebounds si TJ Leaf.
Ang kasamtangang regular season MVP nga si James Harden maoy nangulo sa Rockets pinaagi sa iyang 17 puntos ug 10 assists samtang niamot og 16 puntos si Carmelo Anthony. AP, ESL