Nadela: Asa na ang sulbad sa baha

SA nanglabay nga mga tuig saksi ta sa daghang kalot nga gipasiugdahan sa daplin sa mga karsada. Ang mga karatula nga gipabarug nangayo og dispensa sa mga motorista sa kahasol nga namugna kay kuno palamboon ang drainage nga maoy tumong sa way puas nga kinalutay. Apektado ang bul-og sa trapiko. Nagpanakla ang mga driver ilabi na sa mga PUJ kansang panginabuhi apektado sa maong proyekto. Paglabay sa mga bulan nahuman ang proyekto og duna pa hinuoy nagpadayon pa. Naunsang pagka unsaa nga wa may epekto ang maong proyekto kay ang baha padayon man gihapong nanghasi bisan hinay ra gani ang ulan. Pananglitan ang dalan Colon. Sa nakalabay nga mga tuig grabing kalot ang gipasiugdahan pero ang baha wa gyud masanta. Sa may dalan Tagonol dugay na nahuman ang drainage project pero kanunay lang gihapong sanapan sa tubig kong mobunok ang ulan. Mag eleksiyon naman sunod tuig mapaabot nga ang isyu sa baha malakip sa mga isyu nga tukion sa mga politiko. Sama sa nanglabayng kampanya makadungog na sab ta og tam-is nga mga pulong aron mapuypuy ang nag-umido nga kahiladman sa mga botante nga kanunayng gihasol sa baha.

• • •

Ayaw mo kahibung sa pagdagsa sa daghang politiko dinhi sa ato sa mosunod nga mga adlaw. Mga politiko nga magpa pili alang sa national election. Gani dinhi naman ang uban kanila. Mobalik pa gyud ni sila. Abi ninyo kong ngano? Dinhi sa Sugbo modul-an na sa tulo ka milyon ang gidaghanon sa mga botante. Sa nakalabay nga SK ug Barangay Election ang Comelec nitala og 2,887,455 ka mga rehistradong botante. Kong ipuno kadtong nagparehistro karong bag-o posibling moabot og tulo ka milyon ang mamotar sa eleksiyon sunod tuig. Gumikan sa maong gidaghanon ikaduha sa listahan sa mga politiko ang Sugbo sunod sa Metro Manila nga ilang balik balikan sa pagpangulitawo. Pasabot nga dinhi sa Sugbo dakong pahat sa ilang budget ang ilang ibubu.

• • •

Sa nagpadayon nga relief campaign para sa mga biktima sa landslide sa ciudad sa Naga akong gidasonan ang awhag nga inay ginamit na nga mga senina mas maayo nga brand new nalang ang ipanghatag. Sa akong kasinatian sa nangaging mga katalagman magbaha tinuod ang mga donasyon apil na ang mga senina. Ang problema kay dunay mga senina nga di na masul-ob. Maguwang nalang sa trapo. Ambot kong nataligam-an o gituyo ang pagpanghatag og mga dunot sama sa basura. Makaingon ta nga labayanan ra diay sa basura ang mga biktima. Manghinaot ta nga wa ni mahitabo diha sa Naga. Hinuon dunay daghang nanghatag nga pinili gyud ang senina. Ang uban ka usa pa masul-ob, gilabhan dayon giplansa una gihatod ngadto sa nahimutangan sa mga biktima.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph