SA ka busy sa trabaho ug pag-atiman sa atong mga kabanay ug panimalay, usahay di malikayan nga mataligam-an nato ang pagkaon og insakto ug balansi sama sa Go, Grow ug Glow Foods.
Maayo ang uban nga maka-afford kay makapadayon man sa pag-inum sa ilang mga Vitamins, apan ang kasagaran nato way budget ikapahat ining kakuwang.
Sa Readers Digest nga akong nabasa, kini ang mga simtomas nga daling makita kung ang atong lawas naningil na sa kakuwang sa bitamina ug mineral:
Ang pagpangulbo sa kaspa, labi na kung kawton ang bagol-bagol, maoy unang simtomas nga kuwang atong gikaon sa essential fatty acids sama sa Omega 3 ug ALA nga maoy makatabang pagpa sinaw og dangog sa buhok. Ang mahitabo, mag-uga maong mas maayo mokaon og isda bisag ka duha sa usa ka adlaw. Ang ubang fatty acids sama sa ALA kon alpha-linolenic acid makuha gikan sa mga liso sa wallnuts ug flaxseeds.
Kung ang buhok sab sarang ka pino, nipis ug daling magupok dayon mag-split ends, pasabot kuwang og Bitamina B ug folate (folic acid). Kining Bitamina B kon biotin maoy makapahimsog sa buhok. Ang folate sab makuha sa mga grains sama sa cereals o ba kaha pan. Gani, ang usa ka tasang kan-on daghan na og folate. Sa mga utanon, usa ka tasang spinanch o asparagus makahatag na og 60% nga Bitamina B.
Kung sayo ug kalit midaghan ang uban bisag way kaliwat nga ubanon, pasabot kuwang kini og copper nga maoy maggama og melanin nga maghatag og kolor sa bohok. Kini makuha sa mga kinhason sama sa oysters ug amamakol (mushrooms).
Ang luas ug ang pagliki-liki sa ngabil simtomas sab sa kakuwang og Bitamina 12. Kini makuha sa mga poultry, puwa nga karne (red meat) ug itlog.
Mga bun-og sa tiil (gawas kung naigo o nadapatan) nagpasabot sab nga dunay kakuwang sa Bitamina C nga dunay collagen nga makatabang pagbuhat og blood vessels. Daghana pag-inum ang Bitamina C nga makuha sa strawberries, broccoli, mangga ug ubang mga citrus fruits sama sa oranges, ponkan, grapefruit, pomelo og dalandan.