USA sa lima ka lalakeng napalgan nga patay human natusak-tusak sa bala ang kalawasan,sa Barangay Malubog, Cebu City, niadtong Huwebes sa kadlawon, mao ang iya sa 23 anyos nga call center agent, Christopher Tangag, kinsa nag-part time sud pa lang sa usa ka semana sa pagka-habal-habal driver.
Samtang nagpaabot kagahapon sa udto sa lawas sa ilang nag-inusarang anak lalake ug gihulagway nga dakung nakatabang sa pamilya isip bread winner, ang mga senior citizen nga magtiayong Tangag, (nagdumili nga ibutyag ang mga pangan) igo nalang sa pagtan-aw sa hulagway sa ilang anak, nga anaa sa bungbong sa ilang gamay nga giabangang balay.
Matod sa 68-anyos ug 64-anyos nga amahan ug inahan ni Christopher o mas nailang ‘Dodong’ sa ilang pamilya, ug ‘Boyet’ sa kasilinganan, nadawat na nila nga patay na kini, apan di’ ang klase sa kamatayon sa anak.
Matod sa ilang paryente nga aduna kini samad pinusilan sa agtang, liog ug mga bun-og ug pangos sa nagkalain-laing parte sa lawas.
Gihulagway sa pamilya si Boyet nga buotan, manggihuna-hunaon sa pamilya ug wa nisud bisan ka usa sa bisan unsang ilegal nga patigayon.
Gani naningkamot kini nga mahuman ang kursong Information Technology (IT) nga way gasto ang iyang ginikanan,kay usa siya kaniadto sa Cebu City government scholar.
Gitug-an sa amahan nga duha na ka tuig nga nagtrabaho isip call center si Boyet, kapin sa usa ka tuig pa lang naminyo ug adunay siyam pa ka bulan nga masuso’ng anak nga lalake.
Niadtong Hunyo ning tuiga, nangutang kini og motorsiklo aron magamit sa iyang gitrabahuan, ug aron makadugang sa iyang kita.
Sud pa lang sa usa ka semana kini nag-part time isip habal-habal driver.
“But-an, wa koy ikasaway ana akong anak. Pinangga na nako kay gimatuto na nako og tarung... Kana nga nag-part time na siya nga habal-habal driver kay aron iyang mapuno sa bayad sa utang sa motor ug ikabayad sa parking fee sa gitrabahuan (call center agent),” pagbutyag sa amahang’ Tangag.
Dugang sa amahan nga sud pa lang sa usa ka buwan nga ang schedule sa duty sa iyang anak, gikan sa alas 6 sa buntag hangtud sa alas 4 sa hapon, ug niadtong Myerkules sa hapon gikan sa trabaho, nag-standby kini sa gawas sa ilang giabangang balay atbang ra usab sa parkinganan sa mga habal-habal.
Giagni kini ni Antonio Belande, ang habal-habal driver nga naka-eskapo sa pagpamusil, aron sa pagpasakay sa kuyog sa laing nakaeskapo sa kremin nga si Sharmaine Poran.
“Ingon siya (Belande), ‘Dong dad-a ning usa kay di man pwede duha mosakay nako’. Ni-okay ra pud siya (Boyet) kay kinsa man gud magtuo nga mao na’y mahitabo. Ni-okay ra pud siya nga siya’y padad-on niadtong laki,” saysay sa amahan sa biktima.
Grabeng kaguol ang gibati sa pamilya sa dihang wa na mauli niadtong Miyerkules sa gabii, ilabi na nga di kini matawgan, kay gibilin ra ang cellphone nga gi-charge.
Wa magdahom ang amahan nga mao na kadto ang katapusang higayon nga makit-an ang anak.
Wa’ pay plano ang pamilya alang sa legal nga aspeto, focus una sila karon sa pagpahimutang sa patay’ng lawas, ilabi na nga nagkautang-utang pa sila alang niini.
Ilang panghinaot nga makab-ot ang hustisya alang sa gihulagway nga di tawhanon ug di makatarunganon nga pagkamatay ni Boyet.
“Naguol gyud kay but-an na akong anak, ngano gihimo na nila... Ako gusto lage ta ko’g hustisya kon tinuod man naay hustisya. Sakit kayo nakong bation oyy, kay amahan gud ko niya, wa gyud na siya mag-apil-apil anang pasangil nila nga druga,”kahilakon nga pamahayag sa amahan ni Boyet.