Garcia: Ding Kekatamung Talaturu (Our Teachers)

“ING sablang gagawan da magagawa para ipakit karing tau:

Lalaparan da la ring karelang pilakterya

at ding borlas da karing imalan da pakakaba da la;

kapad da la reng dane marangal karing bangketi

at ding pekamaulagang luklukan kilub ding sinagoga;

buri da ing atwan lang ating pamigalang karing palengki

at ing mayaus lang ‘Talaturu’ karing aliwa.

Dapot e kayu payaus Talaturu; uling metung ya mung Talaturu,

at mikakapatad kayu ngan.”

~Mateu Dangka 23: Sunis 7-8

(Matthew 23:7-8)

“Ing taung ini minta ya kang Yesu king bengi at ngana Kaya,

‘Talaturo, balu ming menibat ka king Dyos anting talaturu;

Uling alang makagawa karing tandang deing gagawan Mu nung ala yu Kaya ing Dyos.”

~Wan Dangka 3: Sunis 2

(John 3:2)

“Pakikwanan mung apanigaralan ing katutwan kapamilatan ning pamaglapit

king talaturung pangdiwa. Mangutang mapakumbaba kaya at miyapse pamanyuyu kaya.

Ing kaladwang mekakilala na king sarili malyari yang midake belwan keka uling ikit na

na ing katutwan.

At nung apanigaralan mu na pin ing katutwan, abalu mung deng sablang mabibye

dake Ku la ngan - - at ing ati lu Kanaku, at Kanaku la.

Agya mang metanggap kang pekamakasalanang dili karing makasalanan,

kabud makabili ka king daung ning kamigit-migitang belwan,

alipatan mu na ngan ing laut ding kasakitan.”

~Dalit ning Kakataskatasang Panginwan, Dangka 4: Sunis 34-36

(Bhagavad Gita, Chapter 4: Verse 34-36)

***

King bulang kasalungsungan pagmasusyan da karing sablang pipagaralan ing “Bulan ding Talaturu” anting pamiparangal karing sablang talaturu keti mabilug a yatu. Ding talapagaral da magdaun lang bulaklak, sulat, pamangan at nanu-nanu pa karela anting parangal at pasalamat karela king pamanuru karing bage-bage sukat dang abalu at abakalan king pamanuntun da king gasgas na ning bye da balang metung.

Subali pin karing pengari, deng talqaturu ila ring asna kalapit nung e man pekamalapit a kakakayutus da at akakayabe reng anak a talapagaral at ilang miyuyubug karing pamisip dang sagiwa’t bubut angga na potang lulut na la’t tumwa anting ganap a pangatau a makimasabal, malasakit e mu king sarili da’t pamilya da nung e karing sablang kapara dang tau at kapara dang lelangan keti king yatu.

Tuturu da reting talaturu ing pamamasa, pamanyulat, pamamilang, panugaling makatud, makatau at maka-Dyos at makimasabal karing aliwa. Nung ala lu karing tuturu da ring tawling adwa, e la tutung talaturu deti uling ing bye e ya kabud kebyasnan king makalabwad a katutwan nung e king ganap a katutwan nung nu makayabe ing pamaglugud king Apung Ginu at karing aliwang lelangan Na.

Deng pengari tamu, lakwas na ring ima ilang minuna tamung talaturu uling e ta mebyasang tikdo at lumakad, magsalita at makirandam nung--e mumunang dili--karela. Nung aliwa ila, e ta malyaring magaral karing pipagaralan at aliwang talaturu.

Makanyan man, deng tune talatuki at talasuyu ning Apung Ginu ila ring tune tamu ngan a talaturu bang abalu ing katutwan keti king pangsaguling labwad at ba’tamung abalu a ing labwad ayni aliwa ya ing kekatamung tutwanang tuknangan at santungan.

Ila ring magpakilala nung ninu itamung tagana, a aliwa tamu ing panglabwad a katawan, nung nanu ing kabilyan tamu anting lakwas mababa kesa king Apung Ginu at kekatamung sukat samban at pamintwan karing uitus na’t kaburyan at nung nanu ing sukat tamung daptan anting talasuyung pangalang-angga king Apung Ginu.

Maligayang aldo ring sablang talaturu!!!

***

Dake Talabaldugan:

dili – (palagyu) pamagdili-dili, pamibule-bule, pamigunam-gunam, pamiwari-wari. English – power or faculty of refelction, meditation.

Alimbawa king pamangamit: “Ing dili darala na katamu keng aliwang labwad a maragul pamiyaliwa keng labwad a balu tamu.”

dilíg. pamangdilíg – (palagyu) pamanugtug danum keng nanu mang bage. English – watering of plants, other things or beings. Alimbawa king pamangamit: “Maralas ing dilig nang Rusing kareng tsese nang tanaman inya mabilis lang mamulaklak.”

diliyan – (palagyu) istaka, tulus plasdan o ilug o danuman. English – slender canes or bamboo poles buried deeply for reinforcement of river banks or ponds. Alimbawa king pamangamit: “Kulang la pa reng wewe kwayan bang gamitan kareng diliyan keng Sapang Kwayan at Nigi.”

dilis/diris – (palagyu) mangalating asan a papalangyan anting tuyu anting ulam. English – Stelophorous commersoni: long-jawed anchovy. Alimbawa king pamangamit: “Kulang namu gawan na lang relyenu reng diris Dulor neng asna kanu kamal ing panyaliwan ngeni keni kekatamu.”

dilwariw/dulawari – (palagyu) dalwari king Mawling Kapampangan. English – Acanthus ilicifolius: holly-leaved acanthus, an erect smooth shrub, with cylindrical stems, apair of short sharp spines at base of each stalk, rigid leathery shining leaves having sinuate-toothed margins, flowers closely appressed by bracts, brown shining capsules that have seeds with white testa. This plant is used in soap-making. Alimbawa king pamangamit: “Palagad nang palagad ing pamanubu da reng dulawari kareng barangay king Mawli uling pamaten da la reng mamag-plasdan.”

***

PAMANGAPAMPANGAN: King bulan ayti misasalisi ing abagat at amyam inya ing lisangan at dimla misasalisi mu naman. Deng ayup mamanyatang na la ibat aliwang dane ning yatu bang keti la pa magsantung kabang masampat ing timpla ning panaun keti kekatamu. Malagung akakit ing karelang panyatang king Mawling Kapampangan. Ing labul ning angina king dalan asna kanyaman.

***

PAMIPALINO: Ing Kapisik magnasa ya at manwalang misubling pasibayu ing lagablab ning legwan ning Kalinangan Kapampangan kapamilatan ding keyang dalit, kawatasan, amlat at miyayaliwang kapaglalangan a misulat king pigmulan at tune kulitan kambe ning dalise at mapagmasabal a pamisip at parasan.

Ing panyulat ding pipumpunan yang sukat mataluki at miparangalan kapamilatan ning pamangamit kareti at aliwa ring karing dayu at salungat a paralan dang dela keti Kapampangan. Ing Kapisik ala yang kikilingan a kapanaligan, aguman o ninu man nung e ing Lubusang Katutwan.

Malyaring sumulat king garciakragi@yahoo.com para karing kutang o munikala.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph