KIDAPAWAN CITY -- Hugtanon nga nanghimakak si alyas Marina, usa ka tomboy, sa akusasyon nga siya ang mipatay sa 21-anyos nga dalaga nga si Angelica Fernandez Luzuriaga sa Purok 7, Barangay Lanao.
Nagpatabang mismo si Marina ngadto kang Kidapawan City Mayor Joseph Evangelista sa mikatag sa social media nga siya ang brutal nga mipatay sa biktima niadtong Septyembre 22.
Apan nagtuo ang mayor nga walay kalabutan ang tomboy sa kamatayon sa dalaga.
Magpasaka og kaso si Marina batok sa iyang kaila nga nag-post sa Facebook og nagbutang pa sa iyang hulagway nga siya ang mipatay sa biktima.
Kasong online libel o paglapas sa Anti-Cyber Crime Prevention Act of 2012 ipasaka sa tomboy batok sa nag-post sa Facebook.
Kahinumdoman nga nadiskubre ang patay nga lawas sa dalaga sulod sa iyang kuwarto nga nakaangkon og grabeng samad tinigbasan sa nagkadaiyang bahin sa kalawasan.
Niadtong katapusang semana pa sa bulan sa Septyembre, nagpagawas og P100,000 nga reward money si Mayor Evangelista sa mga tawo nga makatudlo sa mipatay sa dalaga.
Nagpadayon pa ang imbestigasyon sa Cotabato City Police Office ug Criminal Investigation and Detection Group sa Soccsksarger sa maong kaso. (Edgar E. Fuerzas)