MIABOT na sa kapin P106 million nga balor sa ilegal nga drugas ang nasakmit sa kapulisan sa Central Visayas sukad sa pag abot ni Chief Supt. Debold Sinas sa Police Regional Office 7 niadtong Hunyo 4, 2018.
Labing daghan niini nakuha dinhi sa dakbayan sa Sugbo, diin ang katapusan nasakmit sa kapulisan sa dakbayan sa Mandaue sa usa ka anti drug operation sa Barangay San Nicolas niadtong miaging buwan.
Moabot og 1.2 kilos nga balor og P14 milyunes ang nasakmit sa Mandaue City Police Office (MCPO) niadtong Septiyembre 18 gikan sa usa ka magtiayon.
Sa datus nga gipakita sa Regional Intelligence Division, 3,950 na ka drug personalities ang ilang nangadakpan, diin moabot sa 8,984.99 gramos kun 8.9 ka kilo sa gituohang shabu ang ilang nasakmit.
Matod ni Sinas nga kon maghinay-hinay sila sa ilang lihok sa pagpakigbatok sa ilegal nga drugas, magmata nalang silag buntag nga dako na kaayo ang problema sa drugas sa tibuok rehiyon 7.
Gani sa mga nangadakpan ning uwahing One Time Big Time operations, miabot sa kapin 100 ka mga personalidad kasagaran niini dinagko ang mabaligya matag semana.
Iyang giangkon nga atol sa pag serve sa search warrant sa Cebu City Police Office, nadakpan nila ang Tres Marias sa barangay Tejero nga silang Laura Jane Dela Cruz Sebumit, Arlene Ruth Arbiol ug Maeliza Ann Dela Cruz nga iyang gihulagway nga mga big time drug pusher.
Matod niya nga ang tulo maoy ningpuli kang Jeffrey “Jaguar” Diaz, dihang namatay kini.
“Kung himayin lang ninyo ang mga dinakpan, some of them dugay na nga nag operate dinhi. These are not ordinary pushers,” matod ni Sinas.
Ang bana ni Laura naa sa Cebu City Jail, matod sa usa ka police official.
Ang mao nga mga suspek giingon nga maoy hulganan sa drugas gikan sa National Bilibid Prison sa Muntinlupa.
Naa usab sila sa matrix ni kanhi Cebu City police director Sr. Superintendent Joel Doria.
Nanghimakak
Samtang niabot na sab sa 16 ka drug suspects ang namatay atol sa anti drug operation wa pay labot kadtong lima nga gipamusil sa Barangay Malubog diin ang pulis ang unang gipasanginlan nga responsabli.
Lakip na ang pagpamanhig sa duha ka mga opisyal sa Philippine Drug Enforcement Agency 7.
Hugot nga gihimakak ni Sinas nga adunay kalambigitan ang mga pulis sa sunodsunod nga pinatyanay sa Sugbo kay matod nila sila-sila na lang ang nag unayay tungod sa ilegal nga drugas.
Magpadayon pa kini sigun ni Sinas samtang di pa siya marelibohan sa katungdanan bisan pa man kon kinsa pa ang iyang maligsan nga dagkong personalidad.
Gipahibawo usab sa PRO 7 nga sa kapin 9,000 nga personnel sa tibuok rehiyon 7, kapin na sa 5,000 ang ilang na drug test diin pito niini nagpositibo sa paggamit sa ilegal nga drugas nga gipaabot ang desisyon nga mataktak sila sa serbisyo.