NAKAIPSOT ang host Cebu City Sharks-Casino Ethyl Alcohol sa pagpanghudlat sa Makati City Skycrapers aron iposte ang 70-66 nga kadaugan sa miaging gabii sa Maharlika Pilipinas Basketball League (MPBL) Datu Cup sa University of San Jose Recoletos (USJ-R) Basak Campus sa dakbayan sa Sugbo.
Tatawng nadasig sa abiba sa mga tumatan-aw, ang Sharks sayong nakapainit sa ilang opensa ug nakaposte dayon kini’g 14-3 nga labaw sa pagpangulo nila ni Rhaffy Octobre ug Patrick “Cebuano Sniper” Cabahug sa sayong bahin sa kombati.
Ningtabang ang ubang mga magduduwa sa Sharks hilabi na sila si William McAloney, Harold Cortes ug Victor Nunez hangtod nga ilang napaburot ang ilang labaw ngadto sa 54-34 sa ulahing bahin sa 3rd quarter.
Apan human niini, hinayhinay nang nausab ang templada sa duwa.
Sa pagpangulo ni ex-PBA Mark Isip, ang Skycrapers nakapabuto og 8-0 nga rally sa pagsugod sa 4th quarter aron pahakan ang labaw sa Sharks, 49-58.
“Mao gyud ni permi nahitabo nato tungod lagi sa kuwang ta’g manpower. Maka-sustain ta sa first three quarters pero ini’g abot sa 4th quarter, mo-collapse ang atong duwa. Mao ni ang atong gi-build up karon,” matod ni Sharks coach Titing Manalili.
Hinuon nakaginhawa og luagluag ang Sharks dihang nakapabuto og duha ka sunodsunod nga three-point bombs si Cabahug aron inaton og balik ang ilang labaw ngadto sa 66-53 sa nahabiling 4:49 minutos.
Human niini, nagpahugtanay og depensa ang duha ka mga kampo hangtod nga napupos ang oras.
“Ang crowd na lang gyud ang nagpabuhi sa atong players atong higayuna. Pag-start pa lang sa duwa, buhi na man gyud ang duwa sa atong players tungod sa crowd. Kada-cheer sa mga tawo, dako kaayong moral na sa atong players,” dugang ni Manalili.
Ang Sharks mingsaka sa 2-8 nga rekord samtang ang Skycrapers nahagsa sa 6-4 nga baraha.
Sa laing duwa, gipangpukan sa Zamboanga Valientes ang Basilan Steel, 94-80.
Puntos matag usa:
Cebu Sharks (70)- Cabahug 22, McAloney 13, Octobre 8, Cortes 7, Nunez 6, Abad 4, Catli 4, Villafranca 2, Puerto 2, Arong 1, Yu 1. Makati Skycrapers (66) - Ablaza 10, Bautista 10, Lingganay 7, Manlangit 7, Apinan 6, Importante 5, Lasquety 5, Villanueva 4, Mangahas 4. (ESL)