MAAYONG balita alang sa libuan ka mga sumasakay sa dakbayan sa Lapu-Lapu ug lungsod sa Cordova.
Gipahibawo sa Land Transportation Franchising and Regulatory Board (LTFRB) 7 nga moabli sila og 100 ka bag-ong prangkisa alang sa bag-ong public utility jeepneys (PUJ) ilawom sa Public Utility Vehicle Modernization Program (PUVMP) ni Presidente Rodrigo Duterte.
Gipasabot sa director sa LTFRB 7 nga si Eduardo Montealto nga aduna na silay mga dalan nga giila nga maoy subayan sa 100 ka mga bag-ong PUJ nga padaganon sa solar energy kansang rota gamay ang nagdagan nga de-pasaheroan.
Gitug-an ni Montealto nga class 2 type nga PUJ ( sama og klase sa bus) nga adunay 22 ka pasahero ang makarga ang gamiton sa mga operator.
Ang maong PUJs, air-conditioned, free-wifi ug card na usab unya ang gamiton sa mga sumasakay paghatag sa ilang plete diin maguwang ra og gamay sa minimum nga pletihan ang kolektahon sa mga drayber.
Ang LTFRB 7 nitugot sa pagbiyahe sa 15 ka mga bag-ong bus sa mga siyudad sa Lapu-Lapu, Mandaue ug Sugbo aron pag-atiman sa bul-og sa mga pasahero.
Gipahibawo ni Montealto nga abli ang pag-apply sa maong prangkisa ngadto sa mga kooperatiba sa transportasyon, korporasyon o single proprietorship diin ang matag operator adunay labing minus 10 ka unit aron maaprobahan sa LTFRB.
Tinguha sa administrasyon ni Duterte nga ilisan na kadtong mga karaang mga PUJ ug mga jeepney. (PAC)