WAY kahadlok. Misiaw og balik ang operasyon sa druga sa Duljo Fatima?
Kagahapon sa alas 3:00 sa hapon, walo ka mga tawo ang nasakpan sa awtoridad nga nagsuyop sa usa ka drug den sa Barangay Duljo Fatima, dakbayan sa Sugbo.
Si Leia Albiar, information officer sa Philippine Drug Enforcement Agency (PDEA) 7, nitug-an nga nakadawat silag taho labot sa padayon nga pagpadagan sa usa ka suyopanan sa sitio Catwalk sa Duljo Fatima.
Ang mga ahente sa PDEA 7 nihimo og pagpaniid ug nilusad sa pagronda sa dapit atol sa buy-bust operation kagahapon sa hapon.
Lakip sa nasikop ang duha ka lalake nga nagpadagan sa maong drug den ug laing unom nga naatlan nga nanuyop sa sulod sa balay.
Ang mga suspek nakuhaan og mga pinakete sa ilegal nga drugas ug mga gamit sa pagsuyop niini nga mobalor tanan og P115,600.
Ang mga nangadakpan mao sila si Jaime Geralao, 45, electrician, taga Duljo-Fatima; Carlito Jabonillo, 50, aluminum installer, taga Duljo Fatima; Efrel Casas, 33, dryaber sa habalhabal ug taga Barangay Lahug; Kirt Badayos, 25, kutsero ug taga Barangay Pardo; Glory Jun Lunop, 25, construction worker ug taga Duljo Fatima, Felrose Ocampo, 41, way trabaho ug taga Duljo Fatima; Pepe Lunop, 26, parking boy ug taga Duljo Fatima; ug Antonio Lopez Jr., 31, massage therapist ug taga Barangay Poblacion Pardo.
“Naay niduol sa office nga concerned citizen kay naa lagi drug den lagi mao tong gi-surveillance sa atong mga tawo mao tong ganiha giaksyonan nato nga miresulta sa pagkadakop sa duha ka nagpadagan,” matod ni Albiar.
Daghan na ang nasayod sa pagpadagan sa drug den sa maong dapit apan ang mga residente nahadlok lang motug-an sa mga awtoridad.
Ang Duljo Fatima usa sa mga barangay nga gilubloban sa tigpayuhot sa ilegal nga drugas ug gituohan nga nihinay human napatay ang giingong banggiitang drud lord sa dapit nga si Jeffrey “Jaguar” Diaz.
Nagpasalamat ang PDEA 7 sa publiko nga nagpakabana na ug nihatag sa kasayuran labot sa ilegal nga kalihukan sa ilang silingan.
Gipaubos pa karon sa PDEA-7 sa imbestigasyon ang mga dinakpan kon asa sila magkuhaan sa ilegal nga drugas alang sa ilang himuon nga follow-up operation.
Kalapasan sa Sections 5,6,7,11 ug 13 sa Article 2 sa Republic Act 9165 ang giandam nga mga kaso sa PDEA nga ilang ipasaka karong adlawa sa piskalya sa siyudad sa Sugbo. (S)