TUNGOD sa iyang makabilib nga tubag, gikoronahang Hiyas sa Kialeg 2018 ang pambato sa B’laan Tribe sa Barangay Poblacion, Magsaysay Davao del Sur, Septyembre 26.
Siya gipangutana, “Unsa ang imong konkretong himoon kung ikaw ang makoronahan isip Hiyas sa Kialeg 2018?”
Gitubag sab kini ni Cypriz Mae Lorraine Limama Signapan sa pinulunggang English og: "The first concrete thing that I will do is to spread awareness in teenage pregnancy, illegal drugs, and criminality because as what I have noticed nowadays, a lot of Indigenous people especially the youth are indulged in these acts and as a B'laan representative, I don't want that to worsen. I believe prevention is better than cure, and by doing that, I'm already preventing such happenings."
Sa maong tubag sa dalaga, palakpakan ang mga misud-ong sa aktibidad, ug nakuha niya ang pagtando sa lima ka hurado sa kompetisyon.
Ubang mananaug sa kompetisyon mao sila Robie Jane Samling (Blaan) sa Barangay Balnate nga maoy first runner-up, Claudine Bazar (Bagobo) sa Barangay Tacul isip second runner-up, Sunshine Attic (Bagobo) sa Barangay Upper Bala, third runner-up ug Monica Mariano (Bagobo) sa Barangay New Opon nga maoy fourth runner-up.
Luyo sa titulo, nakuha sab ni Signapan ang Best In Talent award.
Gikan sa dose ka mga kandidata, gisala sila ug napili ang Top 5.
Ang Top 5 napili atol sa Talent Showcase and Preliminary, Septyembre 24.
Ang indigay sa mga Hiyas usa sa dagkong kalihukan subay sa tinuig nga selebrasyon sa Kialegnon Festival, nga anaa karon sa ika-11 nga tuig.
Ang selebrasyon pasalamat sa abundang ani ug kultura sa probinsiya.
Karon nga tuig ang festival nagbukas niadtong Septyembre 22 ug natapos kini niadtong 28 sa usa ka Kialegnon Parade, Culmination Program ug Tribal Music Concert.