SHARIFF AGUAK, Maguindanao -- Patay sa engkwentro sa militar alas 2 sa kaadlawon kagahapon ang usa sa mga suspek sa pagpamomba sa probinsiya sa Sultan Kudarat.
Giila ang nakabsan sa kinabuhi nga si Norodin Taib, gituohang miyembro sa Bangsamoro Islamic Freedom Fighters (BIFF) ug molupyo sa Sitio Lab, Barangay Kuloy.
Gibutyag ni 6th Infantry (Kampilan) Division Chief, Major General Cirilito Sobejana nga gisud sa puwersa sa 601st Brigade Philippine Army ang gitagoan sa lima ka suspek apan upat nila ang nanagan ug naka-ipsot.
Giingong miitsa og granada si Taib ngadto sa mga sundalo hinungdan nga napugos ang militar sa pagpusil kaniya og napatay kini.
Narekober sa gipuy-an sa mga terorista ang usa ka Improvised Explosive Device (IED), duha ka Improvised nga granada, tulo ka cellphone ug mga importante nga dokumento.
Si Taib usa sa mga gitudlo nga suspek sa pagpamomba sa Isulan Sultan Kudarat niadtong Agosto 28 ug Setyembre 2.
Nagpasalamat sab si 601st Brigade Commander, B/General Diosdado Carreon sa mga sibilyan nga nagpaabot og impormasyon sa ilaha sa gilubluban sa mga terorista. (Edgar Fuerzas)