Todino: Hagit sa tanan

SA GIDAGHANON nga 91 ka mga pulis nga nangasikop ug napasakaan og sumbong uban ang pito nga nangamatay sa milabayng 19 ka bulan nga operasiyon batok sa mga badlongon nga pulis kinsa bay dili maalarma niini.

Basi sa report sa SunStar Manila, nagsugod ang kampaniya sa Counter-Intelligence Task Force nga gipangulohan ni Senior Superintendent Romeo Caramat Jr sukad niadtong Pebrero 3, 2017.

Nangalambigit kining mga eskalawag nga pulis sa nagkadaiyang kalapasan ug illegal nga kalihukan apil na ang pagpangilkil.

Dunay 7,431 ka mga PNP personnel gipahamtangan og disciplinary penalties tungod sa nagkadaiyang kalapasan sa ilang panarbaho.

Moabot sab ngadto sa 2,169 ang gipalagpot sa serbisyo, 4,133 gipangsuspenso, 436 gipaus-osan ilang ranggo, 464 gibadlong lang, 30 ang gidid-an pagbalik sa ilang kampo, 48 gitangtangan sa pribilihiyo, ug 151 ang gi-forfeit ilang suweldo.

Ang upat niadtong pito nga nangamatay nangalambigit sa drugas ug gika-engkwentro sila sa CITF.

Hunahunaa lang kon wala maaresto kining mga eskalawag nga pulis daghan pang-inosenting sibilyan nga ilang mabiktima. Ug daghan pang tarong nga mga pulis nga posibli ilang maagni ngadto sa kabuang.

Segurado ta nga duna pay daghan mga tunto nga pulis sa atong palibot karon. Busa dili angay lugakan sa liderato sa PNP ilang kampaniya batok niining nga hiwi nga pulis.

Bag-o lang gipatuman ni Presidenti Duterte ang pagdoble sa ilang sweldo ug paghatag og ubang mga benepisyo. Apan, taliwa niining tanan nagpadayon gihapon kining ubang pulis sa ilang dautang buhat.

Dili sayon ang maong kampaniya kay dunay mga pulis nga gisaligan na unta sa ilang departamento tungod sa taas nga kasinatian niini apan dili magamit iyang kahibalo tungod sa kwesiyonabli nga kalihukan.

Dunay mga badlongon nga mga pulis nga gusto na usab magbag-o apan maglisod na usab sila sa paggawas sa ilang pundok. Ang uban kanila wa na maghandom nga mag-usab pa.

Unya kining publiko usab dili magpakabana sa problem hangtod kon sila na mismo ang mabiktima niining mga way puangod ka mga pulis.

Busa naisip gyud nato nga dakong hagit kining paglimpiyo sa hugpong sa kapolisan batok sa mga eskalawag.

Ang miyembro sa komunidad makatabang sa maong kampaniya. Nagdaseg si Caramat nga isumbong dayon kadtong mga badlongon nga pulis sa ilang hotline 0998-970-2286 ug 09995-795-2569 o diha sa ilang Facebook Messenger nga “Counter Intelligence Task Force’ @PNPCITF.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph