BASKOG. Ang kahimtang sa panglawas sa usa ka presidente sa nasud sama ni Presidente Duterte importante alang sa kasayuran sa katawhan. Gawas nga gilagda kini sa atong Batakang Balaod, usa ka obligasyon sa presidente o sa iyang kalihim sa pagpahibawo sa estado sa iyang panglawas.
Si Presidente Duterte wa magtago sa sakit nga iyang gibati karon. Iyang gitug-an atol sa iyang pakighinabi sa pundok sa mga retirado nga sundalo nga nagpahiling na siya sa mga doctors sa St. Luke Hospital sa iyang sakit sa yang tutonlan nga posible nga usa ka cancer.
Apan tungod tingale sa kakuwang sa komunikasyon sa opisina sa presidente ug sa iyang tigpamaba nga si Secretary Harry Roque migawas nga namakak si Roque. Sa miagi si Roque mipahibawo sa mga sakop sa media nga si Presidente Duterte wa motambong sa usa ka tigum kay nagpahuway apan didto diay si Presidente sa St. Luke Hospital nagpahiling sa mga doktor.
Bisan pa sa giingon nga gibati karon nga sakit ni Presidente Duterte iyang gipakita nga baskog pa siya ug morag walay gibati nga sakit. Gani, angayan nato iampo nga bisan sa iyang gibati nga sakit karon iyang mahuman ang iyang termino ug nga molampos ang iyang administrasyon alang sa kaayohan sa tanan.
Dunay mga pundok nga kunohay mga dumadapig sila ni Presidente Duterte. Tungod kay duna may sakit si Presidente ilang gusto nga modeklarar si PDRD og “rev gov” aron di makalingkod si Bise Presidente Leni Robredo. Sus, pahuway mo nang inyong gihunahunaan nga wa sa lugar.
Kahibawo ba mo nga kon “rev gov” ta usa ka junta militar ang modula sa atong panggobiyerno? Unya kon junta militar na ang mopadagan sa atong pangamhanan unsay inyong kasiguroan nga ang atong mga libertad ato pa nga mapahimuslan ug magpuyo ta nga malinawon ug malipayon?
Gawas pa usa ka dakong sagpa sa katarong, kaligdong ug katakus sa kababayen-an nga modula sa renda sa atong panggobiyerno kon simbako, tabukon pa ang pila ka lawod, mo-una og panaw ang atong presidente. Di ni paglaban ni Bise Presidente Robredo, pero abogada siya ug mas hataas pa og kahibawo kay sa mga nanaway kaniya.
Naghisgot man gud si Presidente Duterte nga kon mokanaug siya pagka presidente kay gikapoy na siya iyang gusto nga si kanhi senador Bongbong Marcos ang molingkod nga presidente kay ni Bise Presidente Robredo. Si Presidente Duterte nakahibawo nga basi sa atong Batakang Balaod ang mosunod og lingkod nga presidente kon mawala ang presidente mao ang pinili nga bise presidente.