MATUD sa mga eksperto sa ekonomiya may daling timailhan sa kapit-os sa panahon. Ingon nila nga usa sa mga timailhan mao ang pagdaghan sa pawnshop o negusyo sa pautang.
Sulti sa pipila ka kawani sa gobyerno nga wa sila mabuhi sa suweldo kon dili sa utang gikan sa Turko.
Ang unang ibaligya sa kabus mao ang ilang kabtangan nga napundar sa panahon nga bastante pa.
Ang ikaduhang timailhan sa kalisud mao ang paglipang sa negusyong pagkaon. Bisan unsang panahon kinahanglang mokaon ang tawo busa maayo kining sudlan nga negusyo sa naglisud.
Matud sa mga sosyolohista kusog mokaon ang naglisud kay mao na lang kini ang kaya niyang paliton aron mabuhi.
Ang ikatulong timailhan sa kalisud mao ang paghitak sa sugal.
Sa pagkatinuod, mapanahon sa kahamugaway ug kalisud, naa na gayud ang sugal. Wala pa si Jesus nga Nazarenhon naa nay sugal sa Ehepto ug Israel.
Daghang nabuang sa sugal nga Pinoy. Naay negusyanteng Insik nga nigula sa Casino nga nag-brief na lang ug nagbaklay kay napildi sa sugal. Ang tanan niyang kabtangan ug negusyo nahanaw.
Daghang nabuang sa sugal karon ilabi nga hapit 1 bilyon na ang premyo sa Ultra Lotto 6/58 sa Philippine Charity Sweepstakes Office.
Didto ko sa palengke sa Calinan niadtong Sabado ug dako nakong kahibulong kung nganong naay hataas nga pila sa tawo pasulod sa tindahan.
Abi nako'g linya sa mopalit og NFA rice kay wala nila panumbalinga ang kainit sa adlaw ug kaabog sa dalan ug akong nasayran nga Lotto Outlet diay kadto.
Larawan usab kini sa tanang Lotto Outlets sa dakbayan. Kadto ra ko nakakita og mga tawo nga nagpila taliwala sa kainit nga walay reklamo, hinunua nagngisi silang bisan nagtulo ang singot ug nag-imagine kung unsay buhaton nila sa kuwarta nga ilang madaug kung palaran.
Hasta si Mayor Sara nitaya sab aron iyang mahatag ang kuwarta nga madag-an sa iyang pamilya, suporters ug pangbayad kuno sa abogado ni Senador Sonny Trillanes IV nga nag-atubang og asunto sa husgado karon.
Gisulayan nako'g pila sa Cabantian Lotto Outlet ug may usa ka drayber sa tricycle nga dali-daling nisuksok sa linya biniyaan ang iyang sakyanan sa daplin sa dalan aron dili mahutdan sa numero.
Matud pa niya nga "Basin diay ako ang palaran. Mailisdan og Mercedes Benz nga taxi ang akong tricycle nga akong ipamasada!"
Tiaw mo nga sa P24 nga taya makadaug ka og P900 milyon? May kanhi titser namo sa Math nga nagsige la'g compute kung unsang numero nga moguwa sa Last Two aron makabawi sa pila ka tuig niya nga pagsugal.
Sa adlaw sa iyang pagkamatay ug wala siya makataya, didto pa niguwa ang numero nga iyang gi-mentinar. Hastang buanga uy!