UNANG apil pa lang ni Francis Rainer Alvarez o mas naila nga si Ariane Alvarez sa dako nga pageant susama sa Queen of Tisa ug swerte siya nga mao ang nakoronahan isip Queen of Tisa - Universe.
Ang 29-anyos nga transgender dili kontesera, apan tungod kay labing una ang Queen of Tisa nga gipahigayon niadtong Siomai Festival sa nakalabay nga buwan, nangurso siya og apil.
“Reason nga niapil ko sa Queen of Tisa kay gi-encourage ko og paapil sa ubang member sa TIGLASS (Tisa Gay Lesbian Association) since first ni siya nga big pageant sa Tisa para sa mga LGBTQ members ug para maka-experience pud ko og dako nga pageant like Queen of Tisa.”
Si Alvarez kinsa Taga Sitio Caduloy Riverside 2 H.O.A., nanghakot sa maong pageant gikan sa special awards ngadto na sa minor awards.
Unang niapil siya og gay pageant dihang 16-anyos pa siya, apan tungod kay breadwinner sa 12 ka mga managsuon, mas nitutok siya sa pagpangita og kwarta ingon man nanarbaho kini.
“Dili nako first time. Naka apil na ko og pageant sa una pa mga 16 pako ato pero wala na ko nipadayon kay mas nag focus ko og pangeta og trabaho.”
Usa ka hair and make-up artist si Alvarez kinsa mo-hair extension usab.
Kon mobisita ka sa Barangay Tisa, gawas sa sikat nga siomai niini ug mga kan-anan nga anaa ra kilid sa dalan, daghan usab ang LGBT member nga mangrampa matag gabii ug usa niini si Alvarez.
“As a known member of LGBT sa Tisa, never ko ko naka huna-huna or nag-expect nga modaug ko ani nga pageant kay dili jud ko anad og apil ug mga pageant. Ang ako ra gi-hunahuna atong gabhiona kay ang maglingaw ug mohatag og kalipay sa akong kompleto nga pamilya nga grabe ang suporta,” matod ni Alvarez.
Ug atol sa pageants night niadtong Septiyembre 28, kompleto sila nga 12 ka managsuon aron mohatag og suporta kaniya.
Bata pa lang si Alvarez dihang nagbuwag ang iyang mga ginikanan ug tungod kay siya mao ang ikaduha sa managsuon, kinahanglan niini mokayod aron aduna’y ikagasto sa iyang pamilya.
Dose anyos pa lang siya dihang nanglabada na siya aron makatabang sa pagbuhi sa iyang mga igsuon.
Tanan niyang nakat-unan nga trabaho iyang gihimo aron mabuhi ang tanan niyang mga igsuon.
Kutob ra siya sa third year high school sa Tisa kay wa na siyay ikagasto ug makaon, apil na ang iyang mga igsuon.
Hangtod karon iyang gisuportahan ang iyang mga igsuon.
Bugti usab niini, mao ang gugma ug pagtahod nila kaniya.
“Sukad sa akong pagkabata, wala ko naka bati o naka matikod nga wala ko nila gidawat og unsa ko, proud kaayo akong pamilya sukad bata hangtod karon,” si Alvarez nagkanayon.
Lakip sa nadawat nga award ni Alvarez mao ang Leo Revita Ambassadress 2018, Miss Photogenic, Face of JF Model, Ms. Skin 911, Best in Production Number, Best in Fun Wear, Best in Talent, ug Best in Evening Gown.
“Grabe ka memorable jud akong pagkadaog kay September 28 anniversary namo sa akong ka live-in. Akoa jud siguro tong gahiona or gift gyud tos panahon,” si Alvarez kinsa pito ka tuig na sa iyang uyab atol sa pageant’s night.
“Malipayon gihapon kaayo mi niya. Lipay pud ko kay grabe pud iyang supporta nako,” nagkanayon si Alvarez.