KON ikaw ang makadaog sa P1 bilyon nga premyo sa Ultra Lotto 6/58 karong gabii, unsa imong unang buhaton?
Gawas siguro sa pagkalma, ania ang pipila nga angay nimong mahibaw-an.
Tungod kay labaw na sa P300,000 ang premyo, didto na i-claim ang premyo sa Central Office sa Philippine Charity Sweepstakes Office (PCSO) sa kaulohan.
Usa ka empleyado sa PCSO Cebu Branch kinsa nagdumili pagpaila, niingon nga sukad aduna’y Tax Reform for Acceleration and Inclusion (Train) law, kuhaan og 20% ang daog sa lotto kon molabaw kini og P10,000.
Kini nagpasabot nga sa P1 bilyon, P800 milyon na lang imong limpyo niini.
Aron magpabilin nga luwas ang kinabuhi sa makadaog, di pahibaw-on ang publiko kon kinsa ang nakadaog, apan ipahibawo nila kon asa nga outlet gipalit ang winning combination.
Nasayran nga sa P1 bilyon, aduna’y kapin 40 milyon ka mga combinations ang kinahanglan nga pustaan aron makuha ang winning combination.
Kon makadaug
Alang sa managtiayon nga senior citizens nga sila si Celsa ug si Alfredo Arnaiz, hadlok kining makadaog sa maong kandtidad.
Apan wala kini makapugong nila nga mopatad matag Martes, Biyernes, ug Dominggo.
“Kon amo nang madag-an, amo na ideretso’g apod-apod sa mga charities ug foundation,” matod sa 63-anyos nga si Celsa.
Ang lotto operator usab nga si Adi Claurito, 29, nagkanayon nga moabot sa 50 ka tawo matag adlaw sa ilang outlet ang mopatad sa Ultra Lotto.
Nasayran nga ang peak hours gabii na human sa trabaho sa mga mamusta.
Hinuon normal gihapon kini nga gidaghanon bisan kon nisaka og P4 ang presyo matag ciket sa 6/58 gikan sa P20 lang kini kaniadto.
Si Melanie Encio, 24, usa ka lotto outlet operator usab sa usa ka mall nagkanayon nga 70 ka tawo ang mopusta sa ilang outlet matag adlaw.
Karong alas 9 na sa gabii ang draw sa ultra lotto. Atangi kay basin ikaw ang makadaug, apan seguradoang ikaw nakapusta.