MGA bus operator sa probinsya sa Sugbo pormal na nga niduso og petisyon ngadto sa Land Transportation Franchising and Regulatory Board kon LTFRB-7 alang na sa ilang hangyo sa pagpausbaw sa pletehan sa bus.
Kini taliwa sa laing dakong umento sa presyo sa lana nga gipatuman sa mga oil companies karong adlawa.
Ang diesel niumento og labing minos P1.45 matag litro samtang P1 matag litro sa gasolina.
Gipangayong usbaw sa mga bus operators mao ang dugang P4, kun gikan sa P6 mahimo na kining P10 samtang sa unang lima ka kilometro, inay P1.20 sa matag mosunod nga kilometro, mahimo na nga P1.50.
Gipasabot ni Julito Flores, bise presidente sa Cebu Provincial Bus Operators, nga sud sa 16 ka tuig na nga wa sila nangayog usbaw sa pletehan.
Gani kasagaran fare reduction ang ilang gihimo sa pipila na ka tuig kay nakasabot sila sa yangungo sa mga sumasakay.
Apan taliwa sa padayong pag-taas sa presyo sa lana, lakip na sa mga pyesa ug sa ubang mga gikinahanglang gamit sa bus, di na nila makaya pa ang mga galastuhan kon di sila mopausbaw sa pletihan.
Dugang ni Flores, nga di usab sila magpanuko og pangayog usbaw karon ilabi na nga kasagarang upgraded ang uban brand new ang ilang mga bus ug nagsunod sa lagda sa gobyerno aron kalikayan ang mga disgrasya.
“Di na gyud makaya. Sa miaging mga tuig gud, naghisgot mi sa pagsaka sa krudo bah, so among kasabutan nga once ang krudo maabot na og P50 per liter, automatic gyud mi mo-file of petition for fare increase. So karon, ang krudo ron naa naman sa P53, base sa Carcar, kay Carcar man ta, sa probinsya man ta magpatubil, di sa Syudad. P53 na ang presyo sa diesel. So, angayan na gyud mi mangayo’g umento,” gipasabot ni Flores.
Hangyo lang sa grupo ni Flores sa mga sumakayay nga sabton usab silang mga operator.
“Ato lang sad pasabton ang atong mga sumasakay kay di man mi ka-survive na, kon magpadayon mi sa among pletihan nga barato kaayo kay kon moubos sad ang presyo sa diesel, automatic man sad ta moubos ,” dugang pasabot ni Flores.
Human sa ilang pagbayad sa cashier sa LTFRB-7 kagahapon sa buntag, personal usab nila kini nga gitunol kang LTFRB-7 Director, Eduardo Montealto Jr. kinsa nakadayeg nga wa na gipaagi pa sa mga pagwelga ang pagpangayo og usbaw.
Gipasabot ni Montealto nga human sa 15 ka adlaw nga pagpublikar sa gipangayong usbaw, himuon ang public consultation.
Kon unsay resulta sa konsultasyon, iduso kini ngadto sa uluhang buhatan nga maoy mohatag og desisyon kon ihatag ang hangyo nga sa usbaw o dili.
“So first, duna tay consultation, invited ang solicitor general to be represented by fiscal siguro Then ato pinaka-primary stakeholder gyud is the riding public, apil sila sa hearing. After 15 days sa pag-file o pagpublikar nila then uban ang interested sectors, like NEDA, importante ato ning balansehon, kay di basta-basta ta mo-increase,” pasabot ni Montealto.