PATAY si kanhi barangay kapitan Marc Ferdinand “Dindin” Bas, 42, human gipusil sa wa mailhing mga mamumuno sa iyang giabangang balay kagahapon mga ala 1 sa kaadlawon sa Sitio Dumlog, Barangay Simala, lungsod sa Sibonga.
May kalabutan sa illegal drugs ug tulis ang nag-unang duha ka mga anggulo ang gisubay karon sa kapulisan.
Iyang anak nga si Mark Stephen, 23, konsehal sa Lagtang, gipatay niadtong Hulyo sa tawo nga nagmotorsiklo.
Si Bas giingong nagtago-tago na sukad siya ni-resign isip barangay kapitan sa Lagtang, Talisay City human gironda ang iyang balay sa miaging tuig ug nakuhaan og pusil ug mga bala.
Si Chief Inspector Stephen Amamag-id, hepe, sa Sibonga Police station nga nahinabi sa Superbalita Cebu, nagkanayon nga di mominos kapin sa lima ka mga tawo ang ningpatay kang Bas.
Usa ang nagbantay sa gawas, usa sa pultahan ug tulo ang ningsulod og pugsanay.
Ang mao nga mga tawo nakit-an sa usa ka saksi, kinsangan gipugngan ning mantalaan.
Nakadawar sila og usa ka tawag gikan sa wa magpailang concerned citizen nga dunay pagpamusil sa dapit.
Nipadala sila og unang mga responder aron mosusi, apan way bisan usa ka tawo ang nagpakita sa dapit hinungdan nga wa matultoli ang crime scene.
Ang iyang mga sakop namalik na lang sa agi.
Ang mga killer ninggamit og tangke sa liquefied petroleum gas (LPG) aron pagguba sa pultahan sa balay.
Gituohan nga si Bas nidagan ngadto sa second floor diin siya napalgang patay.
Gitawgan sa caretaker ang kapuyo ni Bas aron pahibaw-on sa pagpamusil.
Mga ngan sa duha gipugngan ning mantalaan tungod sa ilang hangyo tungod sa seguridad. Atol sa hitabo, nag-inusara si Bas kay ang iyang kapuyo didto sa Talisay City nagtrabaho.
Ang kapuyo ni Bas wa na modayon sa pagsulod sa dapit kay nagbunok ang uwan ug ngitngit.
Ilang gipaabot nga mabuntag una pa nila gisulod ang balay, diin si Bas nakaplagan nga nagbuy-od ug naglunang sa dugo nga patay na.
Mga basiyo sa bala sa armalite rifle ug 9mm nga pistola ang nakaplagan sa crime scene.
Gusto unta sa kapuyo nga itago ang hitabo, apan ang punerarya nibalibad kay kinahanglan kining itaho sa kapulisan una nila hipuson ang lawas.
Matod ni Amamag-id nga nanawag ang kapuyo og kabanay nga mao nay niadto sa kapulisan aron pagpahibawo kanila sa hitabo.
Ilang nasuta nga si Bas nagsugod og abang sa balay niadtong Hulyo 5 pipila ka adlaw sa wa pa mapatay si Art Stephen.
Ang amahan, kinsa nagtago-tago na sukad nasikop sa raid sa iyang balay, giingon nga wa makatambong sa haya ug lubong sa iyang anak.
Nalakip ang iyang ngan sa listahan ni Presidente Rodrigo Duterte sa mga narco-politician.
Way gawasgawas
Nasayran sa Superbalita Cebu nga si Bas wa mailhi sa mga lumolupyo kay tagsa ra kini mogawas sa iyang gipuy-an.
Nakugang na lang sila nga ang napatay kagahapon mao si Bas.
Si Police Regional Office (PRO) 7 Director Debold Sinas nimando sa Sibonga police station pagpalawom sa imbestigasyon sa pagpatay kang Bas.
Giangkon ni Sinas nga gipaubos nila sa monitoring si Bas human malambigit ang iyang ngalan sa illegal nga drugas sa syudad sa Talisay ug nalakip sa listahan ni Duterte.
Sa ilang nahibaw-an nga naa ra kini sa Talisay apan nahibulong siya nganong naabot sa lungsod sa Sibonga. Dugang taho ni AYB