Sakop sa batman giihaw
NAGBUY-OD ug wala nay kinabuhi nga nakaplagan ang usa ka lalaki kinsa puno ang nawong sa pinusilan niadtong Martes, mga alas 5:00 sa hapon sa Zone-10, Cugman ning siyudad sa Cagayan de Oro.
Giila ang biktima nga mao si Reynaldo Serrano, 36, ulitawo, taga Upper Kolambog, Lapasan ning siyudad ug usa ka sakop sa Batman 387.
Si PO3 Edgardo Dador sa Police Station 10 (PS10) sa Cugman nibutyag sa Sun.Star Superbalita nga nakita ang patayng lawas sa sulod sa puloy-anan ni Alexander Clarido, apan ang maong tag-iya wala na sa puloy-anan niadtong tungora.
Usa sa Barangay Kagawad sa maong dapit ang nakamatikod sa biktima human nadungog ang sunod-sunod nga buto niadtong tungora.
Pipila pa ka oras ang nilabay una girespondihan sa maong kagawad sa pagtuong ordinaryong buto lamang ang nadungog.
Apan nakitang nagbuy-od ug wala nay kinabuhi si Serrano sulod sa panimalay mga alas 4:45 sa hapon ug tupad niini ang kalibre .22 nga handgun ug improvised shotgun.
Matud ni Dador nga atol sa hitabo nakit-an sa maong dapit ang dali nga nigadan ug nagkadugo nga mao si Miguel Abao, 34, taga Puerto ning siyudad hinungdan nga gisikop sa kapolisan ug kasamtangan nga gikustudya. Apan ning panahona dili motingog ang gituohang suspetsado kung storyahon sa kapolisan.
Dihang girespondihan sa kapolisan sa PS10 si Serrano dili mahitsura ang nawong niini tungod sa kadaghan nga igo sa bala sa nawong nga maoy hinungdan sa iyang hinanaling kamatayon ug aduna pa samad nilubaan.
Nakuha sa crime scene ang duha ka mga armas, duha ka rounds sa shotgun, kutsilyo ug kwarta nga P500 gikan sa pitaka niini.
Gani atol sa insidente usa ka Roger Agbu ang naigo gihapon sa saag nga bala samtang kini nagbaklay nga gituohang nagumikan sa pagpamusil kang Serrano. Naigo si Agbu sa iyang ulo ug baba nga bahin ug gidala ning panahona sa Northern Mindanao Medical Center (NMMC).
Matud ni Dador nga walay nakasulti kung kinsa ang nihimo niini sa biktima apan kwestyonable sab alang kanila kung nganong namatay kini sulod pa sa puloy-anan ni Clarido.
Wala sab maimbestigar niadtong tungora si Clarido human wala nay nakitang tawo sa maong balay gawas kang Abao.
Giingong si Serrano usa ka sakop sa notoryus nga grupong Batman 387 ug gibutyag sa mga nakasaksi nga namatikdan ang biktima nga niabot sa maong dapit ug nanulong nga posibleng adunay gikaaway.
Gani sa unang pagresponde sa kapolisan wala masayri ang pangalan sa biktima. Sa Bollozos funeral parlor na kini nailhan dihang gi-claim sa mga hingtungdan.
Blangko ang kapolisan ning panahona sa motibo sa pagpatay sa biktima.