USA ka estudyante gipusil, patay didto sa siyudad sa Cotabato.
Ang biktima giila sa kapulisan nga si Twester Solaiman, 21 anyos, ug nagtungha sa Cotabato City State Polytechinc College.
Sa report nga nakuha gikan sa Cotabato City Police Office, nasuta nga nahitabo ang insidente, alas siyete sa gabii, Martes.
Miguwa sa imbestigasyon sa pulis nga samtang naglakaw ang biktima sa Bonifacio Street gikan namisita sa iyang hinigugma, gisugat kini sa duha ka wala mailhing suspek, ug way daghang istorya gipusil siya gamit ang ..45 nga pistola.
Patay diha dayon si Solaiman kinsa naigo sa ulo ug dughan.
Ang duha ka suspek, abtik nga nikabayo sa motorsiklo, mipasirit og padagan paingon sa wala matino nga direksiyon.
Pahayag ni Saliba, igsuon sa biktima nga sa wala pa mahitabo ang insidente nakasulti kaniya ang napatay nga may karibal siya sa iyang hinigugma.
Sumala pa nga gihulga sab ang biktima nga patyon kun makit-an kini sa panimalay sa dalaga.
Gipahayag ni Cotabato City Police Director Sr. Supt. Willie Dangane nga may anggulo na silang gitutukan aron masulbad ang krimen. (Edgardo Fuerzas)