DUHA ka mga lalaking armado nga gidudahang tigpangilkil sa mga lumalabay nga sakyanan ang nasikop sa kapulisan didto sa Barangay Osme¤a, lungsod sa Compostela, Comval Province.

Giila ang mga dinakpan nga mao sila Angelito Lausa, 56, molupyo sa Purok 6, Maputi, Barangay San Jose, sa lungsod, ug ang iyang kauban nga si Jerry Alicante.

Matud sa report gikan ds Comval Province Police Provincial Office alas 7:00 sa gabii niadtong Lunes, nasikop sa mga sakop sa Compostela Municipal Police Station ang mga suspek sa ilang gilusad nga checkpoint.

Nasignit ang duha human nasakpang naghupot og pistola ug kutsilyo dihang gikapkapan.

Nakuha gikan sa mga dinakpan ang usa ka kalibre .357 revolver ug usa ka kutsilyo.

Ang duha ka mga dinakpan, gireklamo sab nga nangilkil sa mga sakyanan nga moagi sa lugar..

Nabawi sab sa mga otoridad gikan sa mga dinakpan ang wa pa matinong kantidad sa kwarta nga gituohang gikan sa ilang mga nakilkilan.

Si Lausa giingong maoy tigpanion og pusil sa ilang biktimahon samtang si Alicante maoy tigkolekta.

Kasong illegal possession of firearms ug illegal concealment of deadly weapon in relation to Comelec gun ban ang gihikay karon sa kapulisan batok sa mga dinakpan. (Marvin Pineda)