DUHA ka mga insidente sa pagpangawat ang nahitabo sa balwarte sa Sta. Ana Police Station sa siyudad sa Davao sud lamang sa pipila ka oras.
Unang misumbong sa ilang buhatan ang usa ka Angelita Ancheta, 47, minyo, empleyado ug molupyo sa Sto. Niño, Dalisay, Agdao nga nawad-an sa iyang bag samtang tua sa balay sa iyang kauban sa trabaho.
Matud sa biktima, niadto lamang siya sa bay sa iyang kauban nga si Marilyn Olido sa Barrio Tinago, Ubalde sa Agdao ug natulog.
Apan mga alas 4:00 sa hapon niadtong Martes, iya na lamang namat-an nga nawala na ang iyang bag nga may sud nga duha ka Nokia cellphones nga 2600 ug 1100.
Tungod kay wala siya masayud sa buhaton nisumbong siya sa kapulisan.
Hinuon, paglabay sa pila ka oras, si Ancheta nagbutyag sa mga otoridad nga ilang nasayran nga usa ka Archie (apelyido gitago tungod kay wa pa'y kaso) nga taga-Ubalde ra sab ug silingan ni Olido ang mikawat sa bag ug gibaligya kini sa usa ka PUJ driver.
Apan ang suspek, milimod sa maong pasangil batok kaniya.
Sa pikas bahin, mga alas 3:00 sa kaadlawon kagahapon, midangat sab sa Sta. Ana Police Station ang usa ka Julie Ybañez, ug misumbong nga gikawatan sab siya.
Si Ybañez, hingkod ang panuigon ug molupyo sa Sta. Ana Wharf nagtug-an sa kapulisan nga iya na lamang namat-an nga nahanaw ang iyang usa ka rice cooker, usa ka unit sa Nokia nga cellphone, usa ka plantsa ug usa ka bag nga sanina.
Sumala sa biktima nga usa ka alyas Gege ang iyang gisuspetsahang mikawat sa iyang mga butang.
Si Gege, higala ra sab ni Ybañez.
Gibutyag ni Ybañez nga positibo siyang si Gege ang mikawat sa iyang mga butang tungod kay nahibilin sud sa iyang balay ang pantalon ug ang sanina sa maong suspek. (JAR)