GIMANDO sa Regional Trial Court (RTC) ang pagsikop sa usa ka tinun-an human kini nasiplatan nga namalit og armas ug mga bala didto sa siyudad sa Digos.

Si Senior Police Officer 3 Renato Pena, warrant PNCO sa Digos City Police Office, maoy nisikop sa suspek nga si Neon Cris Latonio, 21 anyos, ulitawo ug molupyo sa Barangay Calinan, sakop sa lungsod sa Don Marcelino, Davao del Sur.

Subay sa taho sa DCPO, mga alas 11 sa udto niadtong Martes, nasikop ang suspek subay sa warrant of arrest nga gipagula ni Judge Carmelita Sarno-Davin, sa RTC Branch 19 niadtong Oktubre 19, 2009 tungod sa kasong 'illegal acquisition of firearms and ammos' nga gikalambigitan sa batan-on.

Si Pena kinsa maoy nakadakop sa 21-anyos nagpahayag nga anaa na sa ilang kustodiya ang suspek, ug gilayon sab nga pahibaw-on ang korte alang sa mosunod nga lakang kalabot sa kaso.

Sa pikas bahin, usa ka Crypton nga motorsiklo ang aksidenteng nidasmag ngadto sa laing Suzuki nga motorsiklo didto sa lungsod sa Sta. Maria, Davao del Sur sa samang adlaw.

Mga alas 3:20 ang takna sa hapon niadtong higayona, ang Crypton nga nagbaton sa plakang Ip 9778, kinsa gimaneho sa wa pa mailhing drayber nga adunay duha ka mga nag-angkas nga lalaki ang nagdagan gikan sa maong lungsod ug gikataho nga padong sa siyudad sa Digos.

Sigun sa traffic section sa kapulisan, kalit lang kining nidasmag sa Suzuki nga motor nga nagbaton sa plakang MC-10506 nga gimaneho ni Rogelio Montebon, kinsa taga lungsod sa Sulop, Davao del Sur.

Usa sa mga angkas sa Crypton nga motor, nahiagum og mga pangos ug bun-og sa kalawasan mao nga gitabang kini og gidala sa ospital.

Si SPO1 Antonio Albino, traffic investigator, padayon nga nagsubay sa hitabo. (Dondon Dinoy)