NISANGKO sa maduguong hitabo ang panaglalis sa duha ka mga empleyado sa Lapanday Foods Corporation didto sa Barangay San Isidro, lungsod sa Padada, Davao del Sur niadtong Martes.

Ang biktima, giila nga si Flaviano Lonzaga, ulitawo ug molupyo sa Riverside, Guihing, sakop sa lungsod sa Hagonoy, Davao del Sur, 28 anyos.

Ang biktima, namatay human natusak-tusak sa mga samad-dinunggaban ang nagkadaiyang bahin sa iyang lawas..

Gihulagway sa kapulisan, nga sa wa pa mahitabo ang krimen, gikalalis niini ang iyang kauban sa trabaho nga mao si Arvin Mamac Jadraque, 35, minyo ug taga Lower Limonso sa Padada.

Sumala pa nga samtang naglalis ang duha, nikuha og kutsilyo si Jadraque ug didto kalit nga giduslak ang dughan sa biktima.

Ang kapulisan nga nakadawat og alarma, nagdali sa pag-adto sa lugar sa krimen ug ilang nasuta nga nagbuy-od na ang biktima sa yuta ug naligo sa kaugalingong dugo.

Si SPO4 Florencio Pasigado, nitataw nga gisuwayan pa sa paghatag og 'first aid' ang biktima apan uwahi na ang tanan tungod kay namatay na gayud kini.

Ang grabeng samad sa walang bahin sa iyang dughan ang gituohan nga hinungdan sa iyang hinanaling kamatayon.

Sa inisyal nga pagsubay sa mga otoridad, nasuta sab nga parehong anaa sa ilang trabaho ang duha sa dihang nahitabo ang komprontasyon.

Hinuon, naabtan pa sa kapulisan ang suspek mao nga ila kining gibitbit ug gipaslak sa ilang selda samtang giduso dayon ang asunto batok kaniya.

Nakuha sab sa kamot ni Jadraque ang kapin kon kulang 10 pulgadas nga kutsilyo nga giingong may gigamit niini sa pagluba sa namatay.

Gidason sab sa kapulisan nga apil nga atubangon sa suspek ang kasong paglapas sa election gun ban sanglit apil ang kutsilyo sa mga giilang deadly weapon subay sa balaod sa Commission on Election.

Sanglit patay na ang biktima gidala na lang kini sa Villa Funeral Homes sa lugar aron ipailawom sa autopsiya isip usa sa mga ebidensya sa kaso nga ipasang-at sa kapulisan batok sa suspek. (Uban sa balita ni Dondon Dinoy)