SULOD sa dili mominos 24 oras sa Sugbo--Lunes sa gabii hangtod kagahapon sa buntag--upat ka mga tawo ang gipamusil-patay.
Talisay City
Usa ka barangay tanod apan nag-sideline sa pagmaneho og habalhabal ang patay human gipusil sa wa mailhing mamumuno samtang namasahero kagahapon sa buntag sa Barangay Lagtang, dakbayan sa Talisay.
Ang biktima mao si Roger Labajo, 47, alyas Torjack, barangay tanod sa Barangay Sinsin, dakbayan sa Sugbo.
Si PO1 June Zamora, imbestigador sa Talisay City Police Station nga nahinabi sa mga tigbalita, nagkanayon nga gikan sa bukid ang biktima ug naghatud sa iyang pasahero sa Barangay Tabunok.
Sa pag-abot nila sa nahisgutang dapit, nihiyos ang ligid sa likod sa motorsiklo. Tungod niini, si Labajo nipakanaog sa iyang pasahero ug mangita og vulcanizing shop.
Apan gikalitan siya og pusil sa wala mailhing tawo hinungdan sa pagkahagba niini uban sa iyang motorsiklo.
Si PO1 Zamora niingon nga gisubay pa nila ang motibo sa krimen atol ning pagsuwat. Apan wala sab nila isalikway ang posibilidad nga dunay gikabangi ang biktima ug nangita sab sila og mga saksi sa hitabo sa naasoy nga dapit.
Balamban
Samtang, drayber sa traysikad ang gipusil-patay sa iyang pasahero kagahapon sa buntag sa Sitio Cagay, Barangay Aliwanay, lungsod sa Balamban.
Si Jonaly Claros, 38, dunay kapuyo ug taga Barangay Baliwagan, Balamban patay na nga napalgan nga dunay samad pinusilan, duha diha sa dughan, sampot ug kamot.
Si PO3 Emmanuel Blones sa Balamban Police nga nahinabi sa Superbalita Cebu, niingon nga wala mailhing duha ka tawo nga pasahero gituohang mipusil-patay sa biktima.
Giingong nagmaoy ang biktima nianang miagng gabii ug tungod sa kahubog, duna kini gikalalis.
Cebu City
Nakabsan sa kinabuhi gahapon sa kaadlawon sud sa tambalanan si Jason Faustor 31, taga Tabok, Barangay Lamac, lungsod sa Liloan human pusila sa ulo sa wala pa mailhing lalake nga luwan sa usa ka motorsiklo sa Mindanao Avenue eskina Cardinal Rosales Avenue sa Barangay Luz, siyudad sa Sugbo, pasado alas 8: 00 sa milabayng gabii.
Matod ni Chief Insp. Dindo Alaras, hepe sa Mabolo police station, nga naigo sa ulo ang biktima gamit ang kalibre .45 sa armas sa nagbinugtong nga suspek.
Nagduda ang mga imbestigador nga personal nga atraso ang hinungdan sanglit gisundan na kining biktima ug giatol niini nga naka-stop signal sa maong lugar.
Si Faustor sakay sa iyang motor nga dunay plate number 8914 IQ ug mopauli na unta sa ilang balay sa lungsod sa Liloan sa norte.
Dali nga miabot sa crime scene si Sr. Supt. Royina Garma, director sa Cebu City Police Office (CCPO), aron susihon ang kaso ug gipasusi ang mga CCTV camera sa Cebu Business park aron matan-aw ang hulagway sa panghitabo.
Niabag na usab ang mga security officer sa Ayala.
“Atraso gyud ni, Sir, kay gisundan nani siya daan nya usa ra ang sakay sa motor nga mao ra pud ang nagpusil sa biktima,” matod ni Chief Insp. Dindo Alaras.
Aduna nay gihatag nga impormasyon ang asawa ni Faustor nga posibling makatabang sa ilang pag-ila sa mamumuno.
Mandaue City
Human sa kamatayon sa usa ka barangay tanod sa Cubacub nga si Paulino Vega niadtong Lunes sa hapon, nasuta karon sa kapulisan nga ang biktima ug pag-umangkon niini ang adunay lawom nga kalambigutan o koneksiyon sa Parojinog syndicate.
Gibutyag ni PSSupt. Julian Entoma, Mandaue City Police Office (MCPO) director, ang pag-umangkon niini nga nailang si Ian Vega, anaa sa watch list sa Drug Enforcement Unit (DEU) sa Police Regional Office (PRO) 7.
Sukad niadtong Hunyo, sumala sa pulis, kanunay nga mokuyog sa mga napatay nga Parojinog members nga sila si Mark Lester Castillo, Renan Mabida, ug usa ka top 6 most wanted nga si Crisolito Unito “Sonny” nga napatay atol sa pag-serve sa arrest warrant sa dakbayan sa Lapu-Lapu sa miaging semana.
Duha sa pito ka mga most wanted sa mga Parojinog syndicate nga padayon pang gipangita ang lakip sa nasuta nga tig-adtuan kaniadto sa Cubacub, kainom ug kauban sa pagtan-aw ug pag-apil sa sugal nga sabong sa lungsod sa Consolacion.
Si Ian Vega wa na nipatim-aw karon.
Matod ni Entoma, ang pagpatay kang Vega susama og pagpanghadlok, dungan nga ang pagpanimalos sa Parojinog nga grupo sa gidudahang pagtraydor niini.
Dugang ni Entoma nga kon di makig-alayon kanila si Ian, posibleng pipila pa unya ka patay ang mahitabo sa Cubacub agig pagpanimalos sa Parojinog syndicate.
Nasubay sa kapulisan nga ang grupo nga Parojinog maoy nipatay ni Paulino Vega ug posibleng mao usab ang nagpatay ni retired SPO2 Ranilo Valiente, presidente sa mga drayber sa habalhabal sa Cubacub, nga gipusil-patay niadtong Hunyo ning tuiga.
Nasuta nga si Valiente ang maghatagan og impormasyon sa PRO-7 kalabot sa mga ilegal nga transaksyon sa maong grupo sa dapit, nga niadtong panahona, wa pa masuta nga sakop sa Parojinog group si Castillo ug kauban niini.