SULBAD na ang kaso sa pag-ambush-patay sa Japanese national nga si Junko Hamada human masikop sa mga sakop sa Criminal Investigation and Detection Group (CIDG) 7 niadtong miaging hapon ang gun man.
Ang nasikop giila nga si Gb Bertulfo, 29, taga Barangay Tisa sa siyudad sa Sugbo diin nakuhaan siyag usa ka kalibre 45 ug duha ka bulto sa gituohang shabu nga gibanabana nga mobalor og P120,000.
Matod ni Chief Insp. Randy Caballes hepe sa Mambaling Police station nga giangkon ni Bertulfo ang pagpusil sa haponesa bugti sa dakong kwarta nga gibayad kaniya.
Naila si Bertulfo nga hitman ug mamaligya usab og armas niadtong gusto nga mopalit sa barato nga presyo.
Ang CIDG7 nakadawat sa impormasyon labot sa illegal nga negosyo ni Bertulfo nga maoy hinungdan nga milusad silang buy bust operation nga miresulta sa pagkasikop niini.
“Ni-coordinate nato ang CIDG7 kay naa silay info nga mamaligya nibg suspek og armas mao tong mi assist ta sa ilang operation ug nakuha gyud sya,” matod ni Caballes.
Si Bertulfo gitumbok sa iyang uyab nga si Mary Jane Aguilar sa milabayng buwan human masikop sa gihimong buy-bust operation sa Punta Princesa police station nga maoy nag pusil kang Hamada.
Si Aguilar maoy back rider ni Bertulfo sa dihang ilang giambush ang Haponesa sa dalan N. Bacalso sa syudad sa Sugbo.
Tungod sa maong pagkasikop, matod ni Caballes, sulbad na ang kasong pag ambush patay kang Hamada diin giandam na nila ang kaso nga ipasaka sa korte. AYB