GIKLARO sa Provincial Environment and Natural Resources Office (PENRO) nga tinagsa o indibiduwal ang paagi paglibkas sa suspensiyon sa operasyon sa quarry operations sa probinsiya sa Sugbo.
Kini tungod sa managlahi ga sitwasyon sa matag quarry site ug managlahi nga mga rekomendasyon nga kinahanglang i-comply sa mga operator.
Giangkon sa PENRO nga wala pa gyud nila mahurot sa pag-inspeksiyon ang tanang quarry sites nga dunay permit gikan sa ilang opisina, sukad gipatuman ang suspensiyon sa tanang quarry operations.
Matod ni PENRO Head Jayson Lozano nga gi-una nila sa pag-inspeksiyon ang mga quarry site nga nagsuporta ug lain pa nga mga industriya.
Sa pagka-karon, 18 pa ka mga quarry site ang hingpit nga na-inspeksiyon sa PENRO apan puno ang ilang schedule alang sa pag-inspeksiyon sa uban pa nga mga site.
Sa mga nainspeksiyon, gitumbok ni Lozano nga dunay nabantayan nga mga kakulian busa kinahanglan kining i-comply sa mga operator sulod sa usa ka buwan hangtud 90 ka adlaw, depende sa sitwasyon nga nakit-an.
Balikan sila sa pag-inspeksiyon inig human sa panahon nga gihatag aron pagsuta kon nitamod na sila niini.
Di pa makasulti si Lozano kon kanus-a hingpit nga malibkas ang suspensiyon sa quarry operation sa probinsiya apan matod niya, binagsahon nila kini sa paglibkas sanglit lain-lain man ug kahimtang o kakulian ang matag quarry site. AZLG