SECTIONS
Wednesday, June 19, 2019
SUPERBALITA CEBU

Konsehal, drayber gipangtipi

Gipusil-Patay. Nitiyabaw ang anak nga babaye sa habalhabal driver nga si Danilo Cantila, 53, sa pagkakita niya sa nahitabo sa iyang amahan. Si Cantila, kinsa usa ka drug surrenderer, gipusil-patay sa dalan sa Barangay Cambaro, dakbayan sa Mandaue kagahapon sa udto. (Alan Tangcawan)

DUHA ang gipamusil-patay sa managlahing barangay sa dakbayan sa Mandaue kagahapon.

Patay ang 1st councilor sa Barangay Cubacub ug usa samdan sa nahitabong pagpamanhig sa ilang gisakyang garbage truck sa dan P. Burgos sa likod sa usa ka mall sa Barangay Alang-alang, Mandaue City kagahapon sa udto.

Patay si Konsehal Edgar Bihag, 58, kanhi kapitan usab sa Barangay Cubacub samtang, samdan si Rolando Vega, 57, pag-umangkon sa barangay tanod nga si Paulino Vega, kinsa gipusil-patay usab niadtong Lunes sa hapon.

Ang duha ka mga biktima ang anaa sa passenger side sa garbage truck nga gisakyan, kinsa gimaneho usab ni Cubacub Barangay Kapitan Almario Bihag.

Si Senior Supt. Julian Entoma, direktor sa Mandaue City Police Office (MCPO) niingon nga gisaysay ni Kapitan Almario Bihag nga padung unta silang tulo ug laing unom ka mga tawo ngadto sa MCPO aron pakigkitaan si Entoma.

Alang na unta kini sa pagpahibalo kang Entoma ahin sa ilang nahibaw-an kalabot sa background niadtong Parojinog syndicate members nga napatay sa miaging bulan nga sila si Mark Lester Castillo ug Renan Mabida.

Apan alas 12:35, samtang hinay ang padagan ni Almario tungod usab sa traffic, giingong usa ka lalaking nagtaptap, nga anaa nagtindog kilid sa dan ang kalit nga namusil sa passenger side sa garbage truck.

Si Almario, kinsa wa ra maigo, ang wa nihunong ug nipasutoy sa pagpadagan padung na sa Mandaue City District hospital, diin nakabsan sa iyang kinabuhi ang iyang ig-agaw nga si Bihag, pasado ala una sa hapon.

Si Edgar ang nakaangkon og samad pinusilan sa iyang dughan ug sa tuong kilid nga bahin sa lawas, samtang anaa na sa luwas nga kondisyon si Lando Vega, human usa ka samad pinusilan ang naangkon sa kilid sa lawas.

Gitug-an ni Entoma sa pagpakighinabi sa Superbalita Cebu diha sa telepono nga wa sila’y laing gitan-aw nga hinungdan sa pagpamanhig, kundi may kalabutan gihapon sa pagpanimalos sa mga nahibiling ka-grupo nila ni Castillo sa Parojinog crime syndicate o Kuratong Baleleng gang.

Human nga si Lando Vega, ang lakip usab sa makauban kaniadto nila ni Castillo, Mabida, Sonny nga top 6 most wanted sa Police Regional Office (PR0) 9 nga napatay sa Lapu-Lapu sa miaging semana ug niadtong duha sa pito ka most wanted nga sakop sa Parojinog group nga gidudahang nia sa Metro Cebu.

Si Lando, ang ig-agaw usab ni Ian Vega, kinsa gipangita karon sa kapulisan human giingong maoy suod nila ni Castillo ug Mabida.

Usa sa pangagpas ni Entoma nga kay nagbantay ang mga tawo sa barangay ug duna nay mga gipahimutang nga CCTV sa matag eskina, posibleng nag-atang ang mamumuno sa gawas sa barangay.

Awhag ni Entoma ngadto kang Ian Vega nga mopatim-aw sa kapulisan og mobutyag sa unsay nahibaw-an aron pagtultol sa nahimutangan sa mga nabiling sakop sa Kuratong diha sa Mandaue.

Nipadayag og kabalaka sa ilang mga kinabuhi si Kapitan Almario ug mga kaubanang naluwas human sa panghitabo, hinungdan nga dugang mga pulis ang ipahimutang ni Entoma saCubacub aron mohimo’g pag-roving ug pabutangan usab og outpost.

“Kay kining grupo sa mga Kuratong gud, mamili na sila, kon kinsay tirahan, buot sab nila nga daku-daku sa grupo o sa barangay ug di lang ordinary, hinungdan nga gipunterya usab nila ang barangay opisyal nga si konsehal Edgar,” asoy ni Entoma ngadto sa Superbalita Cebu.

“Mao na hangyo nato sa mga residente sa lugar nga magbinantayon, kon adunay mabantayan nga kadudahan, o bag-o sa ilang panan-aw nga mga tawo, i-report gyud dayon sa ato sa police. Kita sa MCPO, naningkamot gyud sa pag-pin down niining grupoha,” dugang ni Entoma.

sa laing bahin, usa ka habalhabal driver ang patay dihadiha human gipusil sa makadaghang higayon sa lalaking naka-motorsiklo pasado alas 6 sa buntag kagahapon.

Ang biktima mao si Danilo Cantila, 53, residente sa Purok Ampalaya, Barangay Cambaro, Mandaue.

Matod ni Entoma nga padung unta nga maghatud og tinun-an ang biktima sa dihang giatngan kini sa mga mamumuno, dayon pusil niini sa makadaghang higayon.

Wa ra maigo ang bata, human giingong gipanaug pa kini sa mamumuno una gipusil ang biktima.

Gitug-an ni Entoma nga high value target sa drug watchlist sa police station si Cantila, human nga nitahan kini niadtong 2016 ug nipaubos pa og rehabilitasyon ug mo-graduate sa community-based rehab karong Disyembre.

Apan base sa gihimong monitoring sa kapulisan nga nagpadayon kini sa iyang pagpamaligya sa giadiling drugas ug subject sa anti-drug operation sa MCPO sa niaging semana, apan nakaikyas.

Usa usab kini sa gitan-aw nga suspetsado niadtong traysikad driver nga gipusil-patay sa sudlunon nga lugar sa Cambaro niadtong Septiyembre 26 ning tuiga.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph