KON sa niaging semana niingon ko nga sayo na mongitngit ang kalibutan pero wa pa nako mabati ang bugnaw nga huros sa hangin nga mga timaan nga duol na gyud ang Pasko, ning bag-o lang naka-feel na ko sa kabugnaw sa hangin sa gabii hangtud sa buntag.
Hulmigas! Hapit na ang Pasko unya mosugod na dayon ang bag-ong tuig. Paspas kaayo ang dagan sa panahon no?
Mao nga di nato usikan ang oras nga moabot. Kinahanglan duna tay mahimo ug may maani sa atong kahago. Anà!
• • •
Seguradong siniyagitay na sab ni ang mahitabo karong hapon didto sa Robinson’s Galleria. Kini tungod kay may mga artista nga mobisita.
Ang usa pa gyud niining duha kay dugay na kaayong wa makita sa iyang mga magdadayeg. Ang mobisita mao ang mga bida sa pelikulang First Love nga sila si Bea Alonzo ug Aga Muhlach.
Usa sa labing paboritong leading man si Aga sa wa pa kini mobiya sa ABS-CBN ug niapil sa politika.
Karong nibalik si Aga ug nibalik na sab ang iyang timbang kanhi (niagi siyag katambok) nibalik na usab ang mga proyekto nga kasagaran nahatag sa uban dihang nilayat siya sa laing network.
Kini ang unang panagpares ni Bea ug Aga ug apil ko sa interesado kaayo nga motino kon may kilig ba silang duha. May mga esena nga didto gisyuting sa Vancouver, Canada.
Kauban ni Bea ug Aga dinhi sila si Albie Casino, Edward Barber, Sandy Andolong ug uban pa, samtang si Paul Soriano ang direktor.
Ang First Love gigama ubos sa Ten17 Productions, Star Cinema ug Viva Films ug isalida na sa Miyerkules, Oktubre 17.
• • •
May bag-ong musical-variety show ang GMA 7 nga gitawag og Studio 7. Magsugod kini karong Dominggo, Oktobre 14, sa alas 7:40 s.g. hangtud alas 8:40 s.g.
Sa unang duha ka episode, ang Asia’s Romantic Balladeer nga si Christian Bautista, Asia’s Pop Sweetheart nga si Julie Anne San Jose ug Pop Heartthrob Mark Bautista ang mga bida.
Mopakita usab sa ilang abilidad sa pagkanta ug pagsayaw sila si Gabbi Garcia ug ang bag-ong Kapuso nga si Rayver Cruz. Ang ubang mosalida mao sila si Kyline Alcantara, Migo Adecer, Mikee Quintos, Kate Valdez, ang kaluhang anak ni Carmina Villaroel ug Zoren Legaspi nga sila si Mavy ug Cassy Legaspi, Donita Rose, Tekla, The Clash superstars pinangulohan sa Grand Champion nga si Golden Cañedo, Jong Madaliday, Garrett Bolden, Josh Adornado ug Mirriam Manalo.
Mga bag-ong segments ang ipakita kada semana sama sa Trending, G na G, On The Spot ug uban pa. Si Miguel Tanchangco ang direktor ug si Paolo Valenciano ang creative director.
Ayaw kalimot. Karong Dominggo na kini!
• • •
Padayon sa iyang pagpanimpalad sa Tawag ng Tanghalan sa Showtime ang laing Cebuana nga si Girlie Lapinid-Laspiñas.
Sa pagsulat nako niini, ikatulo na niya napanalipdan ang golden microphone nga naa sa iyang kamot isip defending champion.