KARON nga hapit na ang kalag-kalag, nag-anam anam na usab og panggawas kining mga nagkadaiyang nga mga butan nga may kalambigitan niini.
Usa sa gidagsa karon ang sikat nga horror House 104 nga anaa mahimutang sa V. Ranudo St., Ramos, dakbayan sa Sugbo.
Gawas nga gitukod ang maong balay niadtong 1898, kon tan-awon lang kini nimo sa gawas, gil-asan naka niini.
Sa kantidad nga P100 alang sa mga estudyante ug P150 alang sa regular visitors, mamahimo na nimong ma-tour ang horror house diin duha kini ka andana.
Yes! Di lang kini usa ka andana nga tour apan dako nga balay imong i-tour.
Anaay usa ka kwarto sa maong horror house nga kinahanglan nimo sudlan kay gawas sa ungo-ungo nga naa niini, sure ko manlimbawt imong balhibo kay naay something, it’s for you to find out!
Matod sa co-owner sa House 104 nga si Philip Lim, nga anaa sa lima ngadto sa unom ka minutos ang average sa anaay tour guide nga tour sa horror house.
Gibutyag usab niini sa Superbalita Cebu nga adunay 14 ka mga buhi nga ungo sa sulod.
Nagsugod pag-operate ang ALFAPRO events and promotions, sa House 104 niadtong Septiyembre 22 ug molungtad kini hangtod Nobiyembre 24.
Abli sila gikan alas 3 sa hapon hangtod alas 12 sa tungang gabii.
Tambag nila nga duaw mo og gabii kay mas kuyaw!
Dagsa sila sa adlawng Biyernes ug Sabado.
Ayaw kabalaka kay kun gikulbaan ka or gigutom ka, adunay baligya nga mga pagkaon sa gawas, gawas pa ni sa libreng parking nga 30 slots.
Apan tambag ni Lim nga mas maayo dili nalang magdala og sakyanan ang moduaw sa horror house aron di makamugna og traffic.