DILI angayan nga pahamtangan og bug-at nga silot si mixed martial arts champion Khabib Nurmagomedov.
Kini maoy giluwatan nga pamahayag ni Russian President Vladimir Putin kinsa personal nga nakighimamat ni Nurmagomedov kinsa mipildi sa inilang si Conor McGregor sa ilang championship fight niadtong Dominggo.
Human niya mapildi si McGregor, mihugpa ang kagubot sulod sa arena sa dihang giataki ni Nurmagomedov ang usa sa mga trainer ni McGregor samtang lain usab ang misaka sa ring ug mikulata kang McGregor.
Gipakita sa television sa Russia ang panagtagbo ni Putin ug ni Nurmagomedov uban sa iyang amahan.
Tungod sa kaguliyang, mag-atubang og posibling pagkasuspenso si Nurmagomedov ug sa pagkakaron wala una ihatag ang iyang premyo bisan pa man og magpabilin ang iyang titulo. Bisan pa man sa kontrobersiya, gisugat gihapon ang undefeated UFC lightweight champion og hero’s welcome sa iyang paghiuli sa Russia.
“I will ask your dad not to punish you harshly,” matod sa president ngadto sa 30-anyos nga fighter.
Sa sayo pa, si Nurmagomedov mibutyag nga silutan siya sa iyang amahan tungod sa iyang gibuhat niadtong higayona.
Apan tungod sa hangyo sa Presidente, hayan makalingkawas siya sa pagpahamtang og silot. JBM