SAPON sa usa ka buy-bust operation ang giingong ‘shabu queen’ niadtong Lunes mga alas 6:00 sa buntag sa Purok 5, Barangay Saray, siyudad sa Iligan.
Ang buy-bust operation gihimo sa mga operatiba sa Philippine Drug Enforcement Agency-Northern Mindanao (Pdea 10) pinangulohan mismo ni Intelligence Officer 3 Leopoldo G. Dy-Cezar, kinsa maoy team leader sa Lanao del Norte Provincial Special Enforcement Team.
Sapon sa operasyon ang gituohang drug pusher nga si Victoria Q. Tumanda, 55, minyo, ug residente sa susamang dapit.
Nakumpiska gikan niini ang mokabat sa 7 ka gramo sa gituohang shabu nga gisulod sa usa ka silyadong sachet nga napalit gikan sa usa ka Pdea agent nga nagpatuong buyer. Nakuha usab gikan niini ang dako nga sudlanan nga adunay sulod sa gituohang shabu diin mokantidad og P56-mil tanan.
Gawas sa pagpayuhot sa ginadili nga druga, nakuhaan sab ang suspek sa mga illegal nga video games diin mao ang unom ka unit sa tolilong ug pito ka mga unit sa video karera nga giturn-over sa Pdea sa Police Station 5 sa Iligan.
Ang arestadong suspek ang anaa detenado karon sa Pdea 10 diin mga nakuhang illegal drugs ang gikatakdang susihon sa police Crime Laboratory.
Gikatakda usab nga mag-atubang ug kasong supak sa Republic Act 9165 o ang Comprehensive Dangerous Drugs Act of 2002 ang suspetsado. Nasuta nga taod-taod na kining gihimo sa suspek ug gawas sa pagnegosyo sa illegal nga mga video karera giingong sekreto usab kini sa pagpayuhot sa ginadili nga druga.