Mga duwa karon: (Mall of Asia Arena)
4:30 pm. Northport vs. Meralco Bolts
7:00 pm. San Miguel vs. Phoenix
MAINITON nga kombati ang gipaabot nga masaksihan karong gabii sa dihang magtakos ang Phoenix Petroleum Gas ug ang San Miguel Beer sa main attraction sa nagpadayon nga PBA Governor’s Cup sa Cuneta Astrodome.
Lab-as pa gikan sa ilang saktong dominasyon batok sa NLEX Warriors, 123-97, niadtong Miyerkules, ang Phoenix ni coach Louie Alas gipaabot nga mag-atubang og malisod nga dalan batok sa Beermen nga ning higayona nagpanikad nga maputol ang sunodsunod nga kapildihan.
Taliwala sa impresibong performance nga gipakita sa ilang bag-ong import nga si Kevin Murphy, ang Beermen padayon nga nasugamak og duha ka nagkutay nga kapildihan, apan malaumon si Austria nga maulian ra gihapon ang iyang batos.
Human mapildi sa Alaska Aces sa out of town game sa Antipolo, gisundan usab sila sa pagpukan sa Magnolia Hotshots.
Ang padayon nga pagpaalim sa angol sa no. 1 player sa nasod nga si June Mar Fajardo maoy usa sa nakaapekto sa San Miguel Beer.
Ang panagparang tali ni Murphy ug ni Eugene Phelps kinsa mitali og 51 puntos sa kadaugan sa Phoenix batok sa Warriors, maoy masentro sa atraksiyon ning maong panag-engkwentro.
Ang pagpakgang ni Phelps ug sa Phoenix maoy tahas nga sagubangon karon ni Murphy ug sa kinatibuk-ang puwersa sa Beermen.
Sa kasamtangan, ang Phoenix adunay 6-2 nga baraha samtang ang Beermen 2-4.
Sa preliminary action, ang Northport nga bag-o lang nisalta sa kadaugan human gipukan ang nangiwit nga Columbian Dyip (0-8), ning higayona mosuway sa katakos sa laing naghingutas nga Meralco Bolts (1-5) sa alas 4:30 sa hapon nga panag-engkuwentro. JBM