SA unang higayon, nagkakuyog na gyud si LeBron James ug Lonzo Ball sulod sa korte ug naghatag kini og maayong timaan sa Los Angeles Lakers human nila pildiha ang Golden State Warriors, 123-113, sa ilang preseason game sa Las Vegas kagahapon.
Wa man tuod mahimong starter si Ball niining duwaa, apan iyang gipulihan si Rajon Rondo mga dos minutos ug 13 segundos pa lang gani ang nakalabay sa first quarter.
“It’s just fun to have our full group,” matod ni James.
Wa hinuon mokayod og maayo ang duha. Si Ball bag-o lang naalim gikan sa iyang pagkaangol sa tuhod ug kini maoy iyang unang duwa sa preseason games.
“He plays basketball,” dugang ni James sa kalabot sa iyang nakita ni Ball sa wala pa ang duwa. “He knows how to play basketball.”
Kadto maoy una pa usab ni James nga nakigsangka sa Warriors sukad sa niaging NBA Finals sa dihang giharos sa Golden State ang Cleveland Cavaliers, 4-0.
Daw sa wa kaayo hatagig gibug-aton ni James ang iyang pagkigribal sa Warriors sa preseason games.
Si Brandon Ingram nangulo sa Lakers nga may 26 puntos samtang si James mitapos sa duwa nga may 15 puntos, 10 ka rebounds ug lima ka assists. Midugang og siete puntos si Ball.
Si Stephen Cury naka-23 puntos, Klay Thompson 20 ug 18 ang natampo ni Kevin Durant nga may gipakapin pa nga 12 ka rebounds alang sa pildirong Golden State. Wa hinuon moduwa sa Draymond Green.
Mag-engkuwentro og balik ang Lakers ug Warriors ugma didto sa SAP Center sa San Jose, California alang sa katapusan nilang preseason game.
Sa lang duwa, ang Washington Wizards mipawong sa Detroit Pistons, 102-97, ubos sa pagpangulo ni John Wall kinsa mipabaha og 32 puntos.
Mipakatap usab si Wall og siyam ka assists ug midugang si Bradley Beal og 17.
Gimagic sa Orlando ang Memphis, 102-86. Sila si Jonathan Isaac ug Aaron Gordon pulos mikutlo og tag 15 puntos alang sa Orlando. Gipagtong usab sa kainit sa Miami ang Pelicans, 140-128. JBM