PATAY ang 47 anyos nga lalaki human natumba niadtong Miyerkules sa merkado sa Cogon ning siyudad sa Cagayan de Oro.
Giila ang biktima nga mao si Peter Regahal, 47, taga Barangay 35 ning siyudad sa Cagayan de Oro.
Ang kapolisan sa Police Station 2 (PS2) sa Cogon nibutyag sa Sun.Star Superbalita nga posibleng giatake sa iyang sakit ang biktima tungod kay sa ilang pagresponde nawad-an man kini sa panimuot.
Pipila ka mga tindera sa Cogon ang nibutyag nga nakita ang biktima nga adunay giinom samtang kini naglingkod apan kalit lang nga natumba ug nakuyapan.
Gidali pagdala sa kapolisan ang biktima sa Northern Mindanao Medical Center (NMMC) mga alas 4:15 sa hapon apan nakabsan kini sa kinabuhi mga 6:00 sa gabii.
Gani walay nakaila niini dihang unang giresponde apan ang mga ginikanan sa biktima ang maoy nikuha niini sa morgue sa NMMC.
Giklaro sa kapolisan nga walay foul play sa kamatayon niini gawas sa pagtuong adunay sakit ang biktima.
Apan atol sa pag-claim sa patayng lawas gibutyag sa mga hingtungdan nga adunay sakit sa baga ang biktima ug aduna nay gimentinar nga tambal. Makapila na usab kini ka higayon nga nagpatambal sa lain-laing balay tambalanan ning siyudad. (Stephanie V. Berganio)