Mga silda nanimaho

DAGHAN sa mga nibisita ang nireklamo sa kabaho sa mga prisuhan sa pipila ka mga police station labina gyud sa Maharlika Detention Cell sa Cagayan de Oro City Police Office.

Gikabalak-an nga makadaot ang maong kabaho dili lamang sa panglawas sa mga piniriso apan sa mga nibisita sa maong lugar.

Usa ka wala magpailang caller ang nitawag sa Sun.Star Superbalita ug nagbutyag nga dili lang unang higayon niini namatikdan ang pagpangalisbo sa mga prisuhan apan makadaghan na nga higayon.

Matud sa maong nanawag nga bisan adunay krimen nga gihimo ang anaa sa sulod sa maong prisuhan angay gihapon nga limpyohan ang palibot niini.

Si Police Officer 2 Raul Sardalla, kinsa in charge sa Maharlika Detention Cell nibutyag sa Sun.Star Superbalita ngatinuod nangalisbo ang sulod sa prisuhan apan wala sila magkulang sa pagpahimangno sa mga piniriso nga maghinlo sa ilang palibot. Matag-adlaw usab gihimo ang paghinlo niini.

Usa lamang sa problema ang kahinay sa tubig gani tibuok adlaw walay moagas nga tubig hinungdan nga gabii na makahigayon sa pagkaligo ang mga piniriso ug dili na mabuboan ang ilang mga hugaw.

Tungod usab sa kadaghan sa mga piniriso ug walay igong supply sa tubig hinungdan nga maghuot na lamang sulod sa prisuhan ug manimaho na.

Usa sab sa gireklamo ang prisuhan sa Police Station 3 (PS3) sa Agora tungod sa namatikdang pagpangalisbo niini. Nasayran nga sa sulod lamang mangihi ang mga piniriso ug ibutang lamang sa mga botelya hinungdan sa kabaho.

Apan si Senior Police Officer 4 Bernard Colegio sa PS3 nihimakak niini ug nibutyag nga matag-adlaw ang gihimong pagpanglimpyo sulod sa prisuhan aron mamentinar ang kalimpyo.