TING-ULAN na. Gidasig kita sa pagsalod sa ulan ug tigumon aron may magamit kon manghasi na usab ang El Niño ug magnihit na usab ang tubig sa di pa mahuman ang tuig.
Seguroa lang gyud nga ang inyong tigomanan sa ulan dunay taklob. Basin magki-at ang mga lamok ug… alamsna… dengue! Mao nga mag-amping gyud ta.
***
Lingaw ikaistorya si Piolo Pascual. Ayaw lang gyud siya pakataw-a kay plastikan ko anang iyang “hehehe” nga wa gyuy unod paminawon.
Tsika to da maks ang E-Group adtong Lunes didto sa Feria Restaurant sa Radisson Blu. Daghan mig nahisgutan pero kalabot sa pelikulang “The Breakup Playlist” ang nagpasulabi.
Di unta siya motug-an kon nasyutingan ba gyud ang kissing nila ni Sarah Geronimo. Iya pa gani ming gihagit nga motan-aw aron masuta kon naa o wa bay hawokhawok.
Paet.
Iyang gidayeg si Sarah nga talagsaon nga pagkababaye kay duna pay mga hiyas nga wa maapektohi sa pamalakad sa industriya ug sa modernong dagan sa kinabuhi.
Daghan kuno siyag nakat-onan sa mga musikero nga nakaapil sa pelikula sama nila ni Jett Pangan, Basti Artadi, Teddy Corpuz ug sa pipila ka mga banda.
Naglisod siya sa iyang papel sa tinuod nga kinabuhi isip amahan ni Inigo Pascual pero iyang gipaninguha nga naa siya pirme kon gikinahanglan aron magiyahan ang iyang anak.
Dihang ako siyang gipangutana kon unsay iyang sekreto nga batan-on pa gihapon tan-awon bisan kon hapit na kini magkwarenta anyos, nitubag kini nga “being positive, positive thinking, positive vibes,” pagmahal sa kaugalingon, pagmahal sa kinabuhi, pagpaningkamot nga molambo ang pamarog, paningkamot nga molambo isip artista.
Mao diay ha? Bantay bitaw. May plano? Haha!
***
Klarong nakuyawan ang mga taga Star Cinema ug ang promo diva nga si Josie Pereyra dihang nipasundayag si Piolo sa SM City Cebu event center. Tiaw mo bang nilayat sa entablado ug nitipon sa mga fans nga morag mga iring gibidli nga nipunsisok niya.
Human sa duha ka kanta, diha pa niya namatikdan nga daghan siyag kinawrasan pero todo pahiyom pa gihapon ang kyampaw.
Iya pa tingaling nadala ang papel sa The Breakup Playlist isip rockstar (mao ba?) nga makigdumog sa mga magdadayeg kon magkalisod.
Hinoon, tungod niini, napamatud-an nga bisan pa sa pagsulpot sa mga mas batan-ong artista, morag init nga pan de sal si Papa P nga gikuninitan gihapon.
***
Nakatambong ko dihang gilunsad ang The Jun Esma Show pila ka tuig ang nakalabay didto sa Slabadu Bar & Resto.
Daghan ang nakagusto sa programa pero nawagtang kini kadiyot tungod sa pila ka mga hinungdan. Niingon si Jun nga mobalik ang programa “with a vengeance” sa di madugay. Mao ba? Mag-atang ko.
***
Dunay usa ka batan-ong mag-aawit nga taga Cebu nga giingong makadawat og pasidungog sa kaulohan sa di madugay tungod sa kanta niini nga nisikat og maayo ug gani kantahon kini niya sa maong pasundayag.
Mao na kaha kini ang sinugdanan sa iyang pagsikat sa kaulohan? Kinsa siya? Naa koy gidudahan pero di pa ko sure.