UNSAON man pag-ila kon ang uyab dunay taas nga kalidad para mamahimong kapikas o maayong ika-uban hangtod na sa katiguwangon? Mao ni pangutana nga sa pasiaw pa, nagtangag og dakong ganti.
Di ikahibulong nga hangtod karon daghan pa gihapong mga ulitawong guwang bisag nagkalata na sa ka daghan ang maanyag ug makabibihag nga mga dalaga.
Sa akong pagpangutana sa mga nagpabiling ulitawo nga naka suway og date, kasagaran nila mi-ingon nga lain-lain og kina-iya ilang nabagtan apan duna gyo’y usa unya nga motumaw nga makabihag.
Unsa may mga kumon nga kina-iya nga kasagarang gipangita nga mahimong ma asawa?
Matod sa artikulo sa King Demic nga akong nakuykuyan, kining mosunod ang mga kasagarang gipangita:
Pasensiyosa ug di demanding. Di ka ini niya pugson paghimo og butang nga di nimo gusto kay duna man kini pagsalig sa imong mga desisyon.
Di kini insecure sa inyong relasyon ug di magduwa-duwa sama sa pagpaselos aron lang mapamatud-an nga ikaw matinud-anon sa imong gugma.
Independente ug makabarog ra sa iyang kaugalingon kon mabiyaan. Makasabot ra sab nga di lang siya ang nagtuyok sa imong kalibutan.
Andam mopahat og panahon para sa imong kaugalingong mga lakaw sama sa pagkuyog sa mga kauban sa buhat, ka barkada o duaw sa paryente.
Di sab kini mauwaw ug maayo mo kukabildo ug halubilo kon dad-on sa imong mga kalihukan.
Di magpasagad ug maayong mo atiman sa iyang kaugalingong panlawas .
Di ka ika-uwaw o itago sa publiko ug sa iyang social media account sama sa Facebook.
Kon dunay panagbangi o way pagsibnatanay, di kini dayon mohisgot og panagbuwag apan makig-estorya kon unsaon nga mahilot o masulbad ang isyu.
Duna kini kaugalingong mga damgo ug ambisyon nga gustong kab-uton og mangita kini og pa-agi nga kini iyang ma-abot. Sa katapusan, natural nimong mabati ang ka- swerti sa imong kiliran.
Busa, ayaw na kini siya og buhii kay nagka-anam na ra ba ni sila og kanihit.