MABALIK na ang mga operasyon sa walo ka large-scale quarry ug 15 ka Industrial Sand and Gravel (ISAG) sa Central Visayas nga unang gisuspenso human sa nahitabong landslide sa Barangay Tina-an, siyudad sa Naga nga nikutlo og 78 ka kinabuhi.
Apan pabilin nga suspendido ang large-scale quarry operations sa Apo Land and Quarry Corporation (ALQC) sa pipila ka dapit sa dakbayan sa Naga nga ubos sa Mineral Production Sharing Agreement (MPSA) sanglit nagpadayon pa ang gihimong imbestigasyon sa ulohang buhatan sa Mines and Geosciences Bureau (MGB) human nidahili ang luna sa tulo ka permit areas o MPSAs niini sa Sitio Tagaytay ug Sitio Sindulan sa Barangay Tina-an niadtong Septiyembre 20, 2018.
Ang MGB 7 nilibkas na sa suspension ug nihatag og pagtugot nga makabalik og operate ang maong large-scale quarry ug ISAGs human nihatag og clearance ang ulohang buhatan.
Si MGB 7 Officer-in-charge Regional Director Efren Carido ang nipirma sa paglibkas sa suspension human nitugot si MGB Director Wilfredo Moncano.
Si Marian Codilla, information officer sa MGB 7, nibutyag nga ang paglibkas sa suspension kay subject sa saad sa local government units ug sa mga operator sa quarry ug ISAGs nga motuman sa mga rekomendasyon sa composite technical team nga gilangkoban sa geologists ug mining engineers sa MGB 7 nga nipahigayon og safety ug geohazard survey sa mga palibot nga komunidad diin sila nag-operate. SCG