HELLO po!
How's everybody? Tunga-tunga na gayud sa Oktubre, ug pipila ka adlaw na lamang PASKO na usab - yehey!
Ang kinabuhi makahimuot gayud usahay. Niadtong petsa diyes ning kasamtangang bulan ug tuig, 75th birthday sa akong lolo Samuel “Sammyboy Chickboy” Gonzales. Mao pod kini ang petsa nga nahibal-an sa among kaparyenteha'g higala nga ang suod namo nga si manong Mario Planos, namatay na. Birtdey ug kamatayon ang gisumsuman namong istorya sa lamesa, igsuon.
Kinaugmaan (petsa onse), birtdey na pod sa akong ambungang paryente nga si Ate Juvy Gonzales, ug sa hot spring sa Nabunturan, Compostela Valley kami nag-party!
Sa among pagpauli, among gilili ang haya ni manong Mario sa kinaulahiang higayon. Kini nahitabo pagkahuman sa birtdey nga selebrasyon sulod sa usa ra ka adlaw, igsuon.
Natural natong ginaselebrar ang matag-higayon nga kaya pa natong mobangon. Samtang ang pipila, daw huot ang dughan nila tungod sa kadugo o higala nga mipanaw na. Sa usa ka adlaw, puwede ra gayud malipay ug maguol, no? Dili lang hinuon nato dungan kini nga bation kay maalaaan ta'g nalisoang pangutok, igsuon.
Dili kay yabag mokanta mao ma-guilty mag-videoke apan tungod nagpahipi sa kasakit ang uban, pare. Unsa man diay ang angay buhaton nga sama sa pagtaas sa atong edad; nagpaduol pod ang reyalidad sa kamatayon?
Puwede magmaya; puwede pod maguol, igsuon. Asa man sa duha ka pagbati imong pilion? Ay, condolence pod diay sa pamilya sa akong kumpare nga si Lowil Edaga kay ang iyang papa nga si Bebot, ningpanaw na.
Ang kinabuhi ug kamatayon puwede ra kaayo hisgutan sa pamahaw, paniudto apil sa panihapon apan... andam na ba ka maapsan niini?
Ginoo ra gayud ang nasayud kanus-a kita mo “expire” mao samtang buhi, atong sayron pinaagi sa pagbasa sa Bibliya nga Pulong sa Diyos kung asa ang dalan sa kaluwasan aron magmaya forever atong kalag sa kalangitan. AMEN.