LUYO sa mga hungihong nga atbangan ni PBA Partylist Koko Nograles si kanhi Davao City Vice Mayor Paolo “Pulong” Duterte sa pagka-congressman, daghan og pangutana karon ang katawhan kung moatbang ba gayod si Koko human mi-file sa iyang certificate of candidacy (COC) sa Pulong, Biyernes, Oktubre 12.
Apan, bisan og dunay mga istorya nga sila gayod ang mag-atbang, madasigon na hinuon nga mi-file sa iyang COC si Pulong sa buhatan sa Commission on Elections (Comelec) sa Davao City kinsa giubanan ni Davao City Mayor Sara Duterte-Carpio ug sa bana niini nga si Atty. Mans Carpio ug pipila ka mga supporters.
“Mao ang na-desisyonan sa pamilya sa pila ka bulan namo nga pagplano sa politika,” ingon ni Pulong sa mga sakop sa media nga mi-cover sa pag-file.
Gisulti sab sa kanhi bise mayor nga giingnan na siya sa iyang amahan nga si Pangulong Rodrigo Duterte nga subli siyang paserbisyuhon sa katawhan.
“[He advised me] to serve the people kung paano niya ginawa ang trabaho niya dito [sa Davao],” ingon sa kanhi bise mayor.
Giingon sab niini, nga wala suma pa'y problema alang kaniya kung dunay moatbang kaniya sa pagka-congressman gumikan demokrasya ang nasud.
Nasayran nga gihugonhugonan nga moatbang si PBA Partylist Rep. Koko Nograles kang Pulong subay sa mga nanggawas nga hungihong.
Sa maong higayon, gibutyag sab ni Davao City Mayor Sara Duterte-Carpio nga walay gipaabot nga mensahe ang presidente sa pag-file ni Pulong og COC.
“Wala naman siyang [President] message na pinaabot, the only he asked was kung sino ang vice mayor,” sulti ni Mayor Sara.
Samtang ang Comelec nag-agni sa buot mopapili sa midterm elections nga mo-file na sa ilang COC ug di na hulaton ang ulahing adlaw sa filing karong Oktubre 17, 2018.
“Ready man mi, pero of course, gina-advice namo sa mga gusto magkandidato nga dili na mag-wait for the last day,” ingon ni Jerry Mujal, ang Election Officer IV sa 2nd congressional district ning dakbayan. (Lyka Amethyst H. Casamayor)