PATAY ang usa ka pulis, ingon man duha niya ka mga kauban atol sa ambush kagahapon sa udto sa Sityo Ranger, Barangay Pooc, dakbayan sa Talisay.
Usa ka mamasurahay napagan usab sa pinusilay ug namatay.
Mga biktima giilang si PO3 Micahel Santinno Cortes, 45, Dennis Patiluna, taga sityo Litmon, Barangay Dumlog ug Jose Soroño, 45.
Si Patiluna giila sa iyang kapuyo samtang si Soroño pinaagi sa iyang identification (ID) card.
Si Patiluna, kinsa maoy drayber sa SUV, diha na makaplagi sa gawas sa sakyanan kay giingong nisuway sa pagdagan.
Napagan usab ang usa ka mamasurahay nga si Cresenciana Rangos, 50, taga Barangay Linao sa mao nga dakbayan.
Nakaplagan siyang nagbuy-od mga 200 metros gikan sa SUV nga natusak sa mga bala.
Si Cortes nalakip sa unang listahan ni Presidente Rodrigo Duterte nga nalambigit sa illegal drugs, apan matod sa usa ka kasaligang tinubdan gi-clear kini sa Camp Crame mga unom ka buwan human gibutyag ang listahan.
Si Superintendent Marlu Conag, hepe sa Talisay Police Station, nagkanayon nga sila si Cortes ug mga kauban nagsakay sa Kia Sorento (SUV JDU 934), kolor silver.
Sa ilang pagliko sa eskina, girakrakan gilayon sila sa duha ka mga tawo nga nagmotorsiklo.
Si Conag niingon nga base sa sulti sa saksi, nakabawos pa sila si Cortes hinungdan nga napagan si Rangos.
Nakapadagan pa og 200 metros ang sakyanan una pa nihunong.
Nakita nila si Cortes nga naglingkod sa front seat samtang ang kauban nga wa mailhi sa backseat.
Dunay duha ka mga lalake nga nagsakay sa motorsiklo nga gikatahong maoy nitiwas sa pagpamusil,apan ang saksi wa na makakita kay nihupo sa kahadlok nga maigo.
“Ang tagbalay diha sa duol niingon nga nagsinukliay pa daw sa bala. Nakabawos ang naa sa SUV pero nahadlok naman sila, nanghupo na lang pud,” matod ni Conag sa Superbalita Cebu.
Gipadayag niya nga sutaon pa nila kon pila ang mga killer sanglit wa magkapareho ang mga impormasyon kay dunay mga post sa Facebook nga nagsakyan og four-wheel ang mga killer.
Ang uban way nakita atol buto-buto samtang dunay motorsiklo nga nakit-an.
Susihon nila ang lugar kon may CCTV ba ingon man paabuton sab nila ang report sa Scene of the Crime Operatives (SOCO) 7 sanglit dunay say bala sa armalite nga nakuna sa crime scene.
Nakakita
Usa sa mga gwardya sa Sea Breeze nga di magpaila nitug-an sa interview sa sibyaanang dyHP Cebu nga iya pang nakita ang sakyanan sa mga biktima nga kusog nga nakapadagan samtang adunay motorsiklo nga nagsunod nga nag sige’g pamusil.
“Nagdagan na ang sakyanan paingon diri nya naay nagsunod nga nagsigig pusil kay nagpaka-paka naman ba. Pagka human miliko pasud diri sa Ranger, duha ka tawo akung nakit-an unya .45 (caliber pistol) ug taas ang armas, mitago dayon ko kay maigo pa lang ko,” matod sa gwardya.
Nagtuo ang maong saksi nga nakabawos sila si Cortes sanglit daw sa adunay mga buto nga gikan sa gisakyan sa mga biktima.
Iyang gihulagway nga dugay nahuman ang pinusilay nga milanat pag kapin sa 20 minutos.
Nakabantay na ang gwardya nga ang usa ka motor nga adunay back rider nag-estambay na sa eskina sa wa pa moagi sila si Cortes.
Mao na lang ang nabantayan nga nisunod ang paka-paka sa buto sa armas.
Matod sa asawa ni Cortes nga si Leda nga ang iyang bana gikan sa Barili kay nitambong og hearing sa kaso ug padung na mopauli sa ilang balay dihang gibanhigan.
Gibalhin
Gibutyag ni Conag nga sa iyang nahibaw-an si Cortes, kinsa nailhang Mikmik, kanhi sakop sa Barili Police Station, apan gibalhin sa Sulu.
Ang mga kabanay nga naabot sa lugar nitug-an nga si Cortes dunay balay ug farm sa mga manok igtatari sa Barangay Biasong.
Nasayran sa Superbalita Cebu nga buhi ang mga manok nga sakay sa SUV.
Wa isalikway ni Conag nga may kalambigitan sa ginadiling drugas ang kamatayon sa pulis.
Apan nagpadayon ang ilang imbestigasyon sa kaso.
‘Mao ni most likely nga motibo kay kuyaw gyud labi na kon malambigit sa drugas,” sumala ni Conag.
Si Delia Cortes-Comedero, igsuon ni Cortes, nibutyag ang iyang igsuon nakapatay na ilabi na kadtong mga tawo nga nalambigit sa drugas samtang ang uban gipangdakop niini.
Iyang nailhan ang iyang manghod nga isog ug daghang nasikop nga nalambigit sa ginadiling drugas.
Si Conag wa na mokomentaryo kabahin sa kaso ni Cortes nga nalakip sa listahan sa Presidente.
Cleared?
Usa ka kasaligang tinubdan niingon nga cleared na si Cortes sa Camp Crame.
Human kini ma-cleared, gibalhin kini sa Sulu nga ubos sa Autonomous Region for Muslim Mindanao (ARMM).
Mag-ulian na kini dinhi sa Sugbo aron motambong sa mga kaso sa ilang mga dinakpan kaniadto.
Matod sa tinubdan nga dako kini og farm sa mga manok igtatari sa Biasong.