MAANYAG, tisay, mapaubsanon, ug maalamon ang pipila sa mga hiyas ni Flora May “Tisay” Trocio nga nagustohan ni Jum Kenneth Alcover.
Sa una nilang panagkita sa Toledo City Hospital (TCH) niadtong Pebrero 10, 2012, nabihag na si Jum sa kaanyag sa dalaga.
“Gwapa jud kaayo siya. Na-love at first sight dayon ko niya,” saysay ni Jum.
Pulos sila taga dakbayan sa Toledo apan unang higayon kadto nga sila nagkaila. Ang pamilya ni Jum naa nagpuyo sa Barangay Poblacion samtang sa Barangay Don Andres Soriano (Lutopan) sila si Tisay.
Si Jum, 31, maoy emergency room (ER) supervisor sa mga nars sa TCH, samtang si Tisay, 28, bag-o lang nadawat sa maong ospital.
Human sa unang adlaw nga duty ni Tisay sa TCH, gihatod kini ni Jum sa ilang balay ug gipangulitawhan.
Aron makadiskarte ug dungan silang mamauli, gitakdo ni Jum ang oras sa iyang ting-duty ug kang Tisay sanglit siya ang naghimo sa eskedyul.
Tuod man, human sa 10 ka adlaw, gisugot ni Tisay si Jum sa atubangan sa Sacred Heart of Jesus Parish sa Barangay Poog sa dihang gihatod niini ang dalaga. Atubangan sa maong simbahan, nisaad ang ulitawo nga higugmaon niya si Tisay sa tibuok niya nga kinabuhi.
Ang duha na-engaged niadtong Enero 15, 2017 human sa surprisa ni Jum niadtong Enero 15, 2017, atol sa Sinulog.
Si Jum nakigkonsabo og tag-iya og chopper alang sa giplano nga proposal alang kang Tisay kauban ang ilang mga pamilya.
Samtang luwan sila sa helicopter, nasurprisa si Tisay sa dihang iyang nabasahan ang “Will You Marry Me?” nga nakasuwat sa ubos sa iyang pangan sa usa ka tarpaulin dihang natungod na sila sa Talisay Fish Port.
Niini, wa makatingog si Tisay ug nakahilak labi na dihang gilitok na ni Jum ang mga pulong nga “Babe, will you marry me?” ug dayon tunol sa singsing ngadto niya.
Niadtong Septiyembre 15, 2018, gikasal ang duha sa Cebu Metropolitan Cathedral, dakbayan sa Sugbo.
“Gi-accept ko niya bisan kon unsa may past nako,” sumala ni Jum, nga karon officer-in-charge sa City Health Department sa Toledo City Government.
Human sa seremonyas sa kasal sa Cathedral, gisunod ang salo-salo sa garden sa Montebello Villa Hotel Cebu. SCG