Runner na-igo sa awto, na-ospital

HADUOL na gyud unta siya sa finish line ug posibling malakip na pud unta siya sa Top 5 sa iyang kategoriya, apan daw sa usa lang ka pamilok nahanaw ug nakawang lang ang tanan.

Mao kini nasinati ni Ezel Conde, 22-anyos, kinsa nalandig sa tambalanan sa dihang, sa wala damha, nadasmagan kini sa usa ka awto nga kalit lang mikorba sa rota sa gipahigayong 42nd Milo Marathon Cebu leg kaganihang buntag, Oktubre 14.

Anaa na unta sa kahinam ang gibati ni Conde sanglit pipila na lang ka metros nga makatabok siya sa finish line nga nahimutang sulod sa Cebu City Sports Center.

Apan sa may dalan P. del Rosario ug eskina D. Jakosalem street, sa kalit lang, usa ka awto nga may plate number AAL-1848 nga gimaneho sa giilang si Abel Racaza Tanjay, ang mitadlas ug mibangga kaniya nga nakasurprisa sa ubang mga runners nga nagsunod kang Condez.

Taliwala sa ka kalit sa panghitabo, mga tinugyanan sa balaod ang maabtikon nga miresponde nga wa usab dayon magdugay nasikop ang nagmaneho sa sakyanan.

Si Ricky Ballesteros, ang chief organizer sa Milo Marathon, mibutyag nga si Condez usa ka consistent runner nga perming malakip sa Top 5.

“Competitive runner ni siya, sigi ni siya maapil sa Top 5. Daghan ni siyag kauban, unya siya lagi nag-una kay kusog man ni siya. So paghitabo kita gyud ang iyang mga kauban,” matod ni Ballesteros kinsa personal usab dayon nga mibisita ni Conde sa haduol nga St. Vincent Hospital.

Hinuon, dugang ni Ballesteros, nga misaad ang nagmaneho sa sakyanan nga si Tanjay nga iyang abagahon ang tanang nagasto ni Condez sa hospital.

Dunay mga pagduda nga nakainom si Tanjay sa maong hitabo, apan sa pakisusi, ang Police Station 1 mibutyag nga nagnegatibo ang 19-anyos nga Tanjay sa ilimnon nga makahubog.

Gani misaad kini nga maoy moangkon ug moabaga sa mga gastohan ni Condez sa tambalanan.

Ning pagsuwat, si Conde gikuyogan ni Tanjay ngadto sa UC Medical Center alang sa pagpahigayon og x-ray ug ingon man CT Scan aron pagsiguro sa kaluwasan niini.

Sa habig sa mga organizers, si Ballesteros mipasalig nga ang Milo siyento por siyento nga mohatag og suporta ngadto ni Conde kinsa usa sa 18,000 kapin ka mga runners nga mitubag sa pagbuto sa starting gun sa maong kabuntagon.

Ang nahitabo ni Conde maoy tipik ug kabahin sa laing kalampusan sa tinuig nga Milo Marathon nga sa samang higayon naghatag usab og dugang pagtulon-an. (JBM)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph