ANG kakulang sa sports facility sa ilang lugar maoy gadala ni Keenan Lou James Caburnay dinhi sa Sugbo. Bisan paman bag-o pa ning maong dapit apan iya nang napakita ang iyang kahanas sa natad sa lumba sa dagan.
Si Caburnay, kansang ginikanan usa ka security guard ug sidewalk vendor sa Malaybalay, Bukidnon, maoy mipatugbabaw men’s 21-kilometer race sa Milo Marathon Cebu Leg kagapon nga natapos sa Cebu City Sports Center.
Gihuman sa 24-anyos nga runner ang rota sulod sa usa ka oras, 13 minutos ug 34 segundos nga igo na kaayong makapahimo kaniyang kampiyon sa maong panagtigi taliwala sa usa pa lang ka buwan niya dinhi sa Sugbo.
Gilupig ni Caburnay ang mga Sugbuanong sila si Joseph Arnel Emia ug Agustin Ychon Jr., nga mioras og 1:14:59 ug 1:15:28.
“Didto sa amoa walay track oval mag train ko sa mountain area or muddy area. Kung mag uwan mag lisod ko og train kay lapok man. Traditional rapud ang training didto wala jud mi anang scientific training. Mao na ang rason na niari ko sa Cebu,” sigon ni Caburnay kinsa sakop sa Spectrum Runners Club.
Dili kini ang unang higayon na siya midaog sa Milo Marathon Regional Leg. Kampiyon siya niadtong 2017 sa Cagayan de Oro City sa 21K run ug midaog pud sa 10K niadtong 2015 ug 2016 sa Cagayan de Oro City ug Butuan City.
Sa laing bahin, wala kapugngi si Ruffa Sorongon sa iyang pag-hara sa women’s 21K category human niya matuyok ang rota sulod sa 1:30:18.
Sila si Geniecel Saballa ug Erzincto Peonila maoy nahimong kampiyon sa 10K category. (RSC)