IKATULO ka adlaw na sukad sa unang adlawa sa pag-file sa sertipiko de kadidatura (certificate of candidacy) nga gustong magpapili sa bisan unsang political position ma lokal man o nasyunal, adunay mga bag-ong salta sa politika, adunay ilado ug dunay dili, ug mga magpasubli nga dugay na sa katungdanan.
Adunay dili angayan nga wala mag-apas sa kadaugan, gusto lang mahimong inila ang ilang pangalan, aduna sa’y ilado nga walay tuyo nga mudaug gusto lang manguwarta kung adunay mga pinanser nga mobilib sa ilang kadidatura.
Sa laktud, may mga kandidato nga matinud-anon ug may tigpakaaron-ingnon, -- kini ang angayan natong bantayan karong umaabot nga 2019 midterm elections, pito ka bulan nalang ang paabuton.
May mga kandidato sa Davao region nga nag-alangan nga bangga-on ang anaa sa katungdanan kay nagtuo nga dili sila mudaug. Sama sa probinsiya sa Davao del Sur, kaniadto si last term Digos City Mayor Joseph Peñas 'atat na atat' na nga atbangan ang incumbent governor Dodo Cagas, pero pag-abot sa ting file og COC nagduha-duha na.
Sa pagka mayor sa Digos, gubot pas lukot kay tulo ang managan ubos sa partido sa Hugpong ng Pagbabago (HNP) nga gilangkuban nila incumbent Vice Mayor Reynaldo Hermosisima nga modagan og pagka-mayor, board member Dondon Llanos, ug Arsenio “Boy” Latasa nga nag-ilog sa HNP nga atbangan sa nag-inusarang PDP Laban, Josef Cagas.
Dunay impormasyon nga atong nahipos nga pagka- Congressman ang daganan ni Governor Anthony del Rosario, atbang kang Congressman Pantaleon Alvarez sa unang distrito.
Si Rodolfo del Rosario mobalik sa pagka gobernador, ug ang board member nga si Radney del Rosario, hayan nga mag bise gobernador, apan kung si Antonio “Tonyboy” Floirendo maoy mag bise, hayan magpa re-elect si Radney, samtang si Vice Mayor Boyet Gementiza mao ang ibida sa mga del Rosario pagka-mayor sa Tagum City atbang kang Mayor Allan Rellon, apan kining tanan, mahibaw-an matud pa karong adlawa kay mo-file na sila sa ilang COC.
Sa Davao Occidental, wa'y miharang kang governor Claude Bautista, sa Compostela Valley, gi-atbangan si Governor JV Tyron Uy ni Franco Tito sa pagka gobernador, samtang sa probinsya sa Davao Oriental mura'g walay miharang kang governor Nelson Dayanghirang, ug walay mi-atbang kang Congresswoman Corazon Malanyaon sa unang distrito sa Davao Oriental.
Kinsa kanila ang angay pilion inig-abot na sa hustong panahon?
Susiha ninyo daan ang mga daghang kandidato nga magpapili ning umaabot nga piniliay aron wala kitay angay nga mahayan.