DI mominos 128 ka mga local government units (LGUs) sa Central Visayas (CV) ang nakadawat og Seal of Child-Friendly Local Governance (SCFLG) gikan sa Department of Social Welfare and Development (DSWD) 7 ug Department of Interior and Local Government (DILG) 7 atol sa conferment ug awarding ceremony sa Capitol Social Hall, dakbayan sa di pa lang dugay.
Si DILG 7 Regional Council for the Welfare of Children (RCWC) Focal Person Rothwell Pulido nipasabot nga ang SCFLG gihatag sa tanang dakbayan ug kalungsoran nga nasukod ang level of performance bahin sa pagpatuman sa mga programa ug paghimo og lakang sa pagplambo sa kaayohan sa mga bata sukad niadtong 2014.
Ang SCFLG nag-ila sa 128 LGUs nga dunay klaro ug talagsaong positibong resulta alang sa mga bata ug nakapasar sa annual mandatory Child-Friendly Local Governance Audit (CFLGA).
Ang 128 LGUs naglakip sa 46 ka mga munisipyo gikan sa Bohol, 44 gikan sa Cebu, 17 gikan sa Negros Oriental, lima gikan sa Siquijor, laing 13 ka component cities (Toledo City, Carcar City, Naga City, Talisay City, Danao City, Bogo City, Tagbilaran City, Canlaon City, Bais City, Dumaguete City, Tanjay City, Guihulngan City ug Bayawan City) ug tulo ka highly urbanized cities: Cebu City, Mandaue City and Lapu-Lapu City.
Kini nga LGUs nga dunay SCFLG kuwalipikado nga makadawat og incentive ug award system nga gidumala sa sa Presidential Award for Child-Friendly Municipalities and Cities.
Sila si Executive Director Mary Mitzi Cajayon-Uy sa Council for the Welfare of Children (CWC) ug DSWD Assistant Regional Director for Operations (ARDO) Shalaine Marie Lucero mao ang ni-confer ug nihatag sa pasidungog sa 128 ka LGUs sa CV, diin nakapasar sa SCFLG.
Ang City of Mandaue nikuha sa plaque of recognition alang sa 2016 Regional Winners sa Presidential Award for Child-Friendly Municipalities and Cities (PACFMC) ubos sa highly urbanized city category samang ang Danao City nakadawat og award ubos sa component city. KIni ang pasidungog ihatag matag duha ka tuig.
Lakip ang mga mga lungsod sa Talibon, Bohol ug Valencia, Negros Oriental ang giila isip national finalists sa 2016 PACFMC ubos sa 1st to 3rd class municipality category samang ang lungsod sa Corella, Bohol nakadawat sa samang pasidungog ubos sa 4th to 6th class municipality category.
Ang CWC mapasigarbuhon sa pagsaksi sa naasoy nga LGUs sa pagpalambo ug pagpanalipod sa katungod sa mga bata. (PR)